Palghar News : तालुक्यातील खैरे-पासोरीपाडा येथील शेतकरी अशोक कोंडू पाटील यांनी पहिल्यांदा उन्हाळी भातशेतीसाठी पुढाकार घेत चार एकर जागेत भातपिकाची लागवड केली आहे.

उन्हाळी भातपीक शेती करण्याची ही माझी पहिलीच वेळ असून, विंधन विहिरीच्या सहाय्याने पाणी दिले जात आहे. जया या भात वाणाची लागवड केली असून या शेतीत विशेष नफा झाल्यास यात सातत्य ठेवीन, असे पाटील यांनी सांगितले.

वाडा तालुक्यात भात हे प्रमुख उत्पादन आहे. सिंचनाच्या विशेष सुविधा नसतानाही उन्हाळी हंगामातही भातपिकाची लागवड करून येथील प्रयोगशील शेतकरी अशोक पाटील यांनी भाताचे उत्पादन घेण्याचे धाडस केले आहे.

उन्हाळी भातशेती ही कष्टप्रद आणि त्रासाची ठरत असल्याच्या या सबबीखाली येथील शेतकरी शेती करण्याचे टाळत असतात. त्यामुळे गावातील पडीक क्षेत्रात वाढ होत आहे. मात्र, काही गावांतील शेतकरी धाडसाने उन्हाळी भातपिकाची शेती करून नवा आदर्श समाजासमोर ठेवत आहेत.

यावर्षी तालुक्यात अवकाळी पावसाने भातपिकाची पुरती वाट लावली आहे. ऐन पीक तयार होण्याच्या काळात पाऊस पडल्याने पिकाचे मोठे नुकसान झाले. त्यामुळे तालुक्यातील शेतकऱ्यांचे भातपिकाचे उत्पन्न घटल्याने लागवडीचा खर्चही निघाला नाही.

पीक कर्ज कसे फेडायचे, या चिंतेत असतानाच आपले मनोबल खचू न देता पुन्हा उभारी घेत काही शेतकरी उन्हाळी भातशेती करत आहेत.