Pune News : सह्याद्री फार्मर प्रोड्युसर कंपनीच्या माध्यमातून प्रेरणा घेत गेल्या वर्षीपासून पाणी फाउंडेशनने गटशेतीस प्रोत्साहन देण्याचा निर्णय घेतला आहे. यामुळे वेळ, पैसा वाचतो तसेच चांगले उत्पन्न मिळू लागले आहे. अनेक समस्या आहेत, पण गटशेतीची राज्यभर व्याप्ती वाढवताना डिजिटल तंत्रज्ञान वापरावर भर दिला जाईल.

यातून शेतकऱ्यांना प्रशिक्षण मिळणार असून दोन वर्षांत गटशेतीचा राज्यभर कार्यक्रम राबविण्यात येणार आहे. यामध्ये प्रत्येक शेतकरी जोडला जाईल, असे प्रतिपादन पाणी फाउंडेशनचे संस्थापक आमीर खान यांनी व्यक्त केले.

सत्यमेव जयते पाणी फाउंडेशनच्या वतीने ‘फार्मर कप २०२३ पुरस्कार’ सोहळा बालेवाडी येथील श्री शिवछत्रपती क्रीडा संकुलमधील बॅडमिंटन हॉल येथे गुरुवारी (ता. २९) आयोजित करण्यात आला होता. या वेळी आमीर खान, किरण राव, सह्याद्री फार्मर प्रोड्युसर कंपनीचे अध्यक्ष विलास शिंदे, अभिनेते जॉकी श्राफ, पाणी फाउंडेशनचे सीईओ सत्यजीत भटकळ, अविनाश पोळ आदी उपस्थित होते.

आमीर खान म्हणाले की, आपणाला माती परीक्षण, पाणी, पशुसंवर्धन यामध्ये काम करण्याच्या संधी आहे. कोरोनात अडचणी आल्या, परंतु ऑनलाइन पद्धतीने शेतीशाळा सुरू केल्या. त्याचा शेतकऱ्यांना चांगला फायदा झाला असून सध्या २६ पिकांमध्ये शेतीशाळा घेत आहेत.

‘सह्याद्री’चे विलास शिंदे म्हणाले की, तीस वर्षांपासून गटशेतीचा अनुभव घेत आहे. दुष्काळी भागात या महिला गटांनी मुहूर्तमेढ रोवली आहे. महिला शेतकरी देशासाठी ऊर्जा तयार करत आहे. आपण शेती करत असलो तरी हा देशाचा प्रश्न आहे. जे सरकार करू शकत नाही, ते शेतकरी करू शकतो. त्यासाठी एकत्रित ताकद तयार झाली पाहिजे.

स्पर्धेमध्ये तीन हजार गावे सहभागी

राज्यातील १८ जिल्ह्यांतील ३९ तालुक्यांतील ३ हजार गावे स्पर्धेत सहभागी झाले होते. यातील ३९ तालुकास्तरीय विविध पिकांमध्ये उत्कृष्ट काम केलेल्या शेतकरी गटांना सन्मानचिन्ह, एक लाख रुपये धनादेशाचे चेक देऊन गौरविण्यात आले.

पाणी फाउंडेशनने दिलेले राज्यस्तरीय पुरस्कार

प्रथम पुरस्कार (पंधरा लाख रुपये, सन्मानचिन्ह) : कुंभारगाव अॅग्रो प्रोड्युसर कंपनी, कुंभारगाव (ता. करमाळा, सोलापूर)

द्वितीय पुरस्कार (प्रत्येकी पाच लाख रुपये सन्मानचिन्ह) : आई जिजाऊ महिला शेतकरी गट घोडेगाव (छत्रपती संभाजीनगर), उन्नती शेतकरी गट वारंगा तर्फे नांदापूर (कळमनुरी)

राज्यस्तरीय संयुक्त तृतीय पुरस्कार (प्रत्येकी अडीच लाख रुपये, सन्मानचिन्ह) : प्रगती महिला शेतकरी गट, शेरेवाडी (ता. आटपाडी), रॉयल फार्मर शेती गट सौंदे (ता. करमाळा)