Pune News : महाराष्ट्र राज्य द्राक्ष बागायतदार संघाची तीनदिवसीय द्राक्ष परिषद व वार्षिक मेळावा शनिवारपासून (ता. २४ ते २६) पुण्यात होत आहे.

पुणे-मुंबई द्रुतगती महामार्गलगतच्या वाकड भागातील हॉटेल टीप टॉप इंटरनॅशनल येथे होत असलेल्या या परिषदेचे उद्‌घाटन शनिवारी (ता.२४) सकाळी साडेदहा वाजता माजी केंद्रीय कृषिमंत्री शरद पवार यांच्या हस्ते होईल. अध्यक्षस्थान केंद्रीय कृषिमंत्री शिवराजसिंह चौहान भूषविणार आहेत.

केंद्रीय सहकार आणि नागरी विमान वाहतूक राज्यमंत्री मुरलीधर मोहोळ, उपमुख्यमंत्री देवेंद्र फडणवीस व अजित पवार या वेळी प्रमुख पाहुणे म्हणून उपस्थित राहणार आहेत. ‘पुणे बंद’चे आयोजन करण्यात आलेले असले, तरी या परिषदेसाठी सहकार्य करावे, असे आवाहन द्राक्ष संघाने केले आहे.

द्राक्ष परिषदेसाठी राष्ट्रीय फलोत्पादन मंडळाचे व्यवस्थापकीय संचालक प्रिय रंजन, राज्याचे कृषी आयुक्त रवींद्र बिनवडे तसेच ‘अपेडा’चे अध्यक्ष अभिषेक देव यांना देखील निमंत्रित करण्यात आलेले आहे. परिषदेच्या तांत्रिक चर्चासत्रात देश विदेशातील शास्त्रज्ञ तसेच प्रयोगशील बागायतदार सहभागी होणार आहेत.

शासनाचे वरिष्ठ अधिकारी, कृषी व निविष्ठा उद्योगातील प्रतिनिधी या वेळी उपस्थित असतील. परिषदेच्या निमित्ताने प्रदर्शनाचे देखील आयोजन करण्यात आलेले आहे. या परिषदेमधील तांत्रिक चर्चासत्रे समाप्त होताच सोमवारी (ता. २६) बागायतदार संघाच्या सर्वसाधारण सभेचे आयोजन करण्यात आलेले आहे. सभेला शिवाजी पवार, कैलास भोसले, सुनील पवार, चंद्रकांत लांडगे आदी पदाधिकारी मार्गदर्शन करणार आहेत.