Chhatrapati Sambhajinagar News : देशातील व राज्यातील नामांकित कंपन्या, संशोधन संस्था, प्रयोगशील शेतकरी तसेच शेतकरी उत्पादक कंपन्यांचा सहभाग असलेले आणि कृषीसह संलग्न क्षेत्रातील नवनवीन तंत्रज्ञानाची भरगच्च शिदोरी घेऊन येणारे ‘सकाळ-अॅग्रोवन’चे भव्य ‘अॅग्री एक्स्पो २५’ कृषी प्रदर्शन शुक्रवारपासून (ता. १०) छत्रपती संभाजीनगरात सुरू होत आहे. यानिमित्ताने सोमवारपर्यंत सलग चार दिवस ज्ञान, तंत्रज्ञानाचा जागर होणार असून एक लाखाहून अधिक शेतकरी या प्रदर्शनाला भेट देण्याचा अंदाज आहे.

या प्रदर्शनाचे मुख्य प्रायोजक अॅग्रिकोन न्यूट्रिटेक हे आहेत. तसेच, एन्झोकेम अॅग्रो केमिकल इंडस्ट्रीज, पवन अॅग्रो, पितांबरी अॅग्रो केअर डिव्हिजन, बी. जी. चितळे डेअरी, आत्मा (अॅग्रिकल्चर टेक्नॉलॉजी मॅनेजमेंट एजन्सी), मेडा (महाऊर्जा), एमएआयडीसी या प्रदर्शनाचे सहप्रायोजक आहेत.

याशिवाय, रोहित कृषी इंडस्ट्रीज, इफ्को (इंडियन फार्मर्स फर्टिलायझर्स को-ऑपरेटिव्ह लिमिटेड) हे यंदाच्या प्रदर्शनाचे गिफ्ट स्पॉन्सरर्स आहेत. या प्रदर्शनात कोरडवाहू व बागायती शेतीमधील नवतंत्रज्ञान, यंत्रे-अवजारे बघण्यास मिळणार आहेत. मराठवाडा, विदर्भ, खानदेशासह राज्याच्या विविध भागातील शेतकऱ्यांसाठी ‘अॅग्री एक्स्पो २५’ दिशादायक ठरणार आहे. नामांकित कंपन्या, उद्योग समूहांसह विविध बॅंका तसेच खते, कीटकनाशके, बियाणे अशा निविष्ठा उद्योगांकडून २०० हून अधिक भरगच्च स्टॉल्स या प्रदर्शनात सादर केले जाणार आहेत.

प्रगतिशील शेतकऱ्यांसाठी दर्जेदार कृषी प्रदर्शन अकरा वर्षांपासून ‘सकाळ-अॅग्रोवन’कडून आयोजित केली जात आहे. छत्रपती संभाजीनगरच्या जालना रोडवरील केंब्रिज स्कूलजवळ असलेल्या श्रीराम मंदिर ट्रस्टच्या मैदानावर कृषी प्रदर्शनाला सुरुवात होईल. बळीराजासाठी होणारा हा अनोखा माहिती ज्ञान-तंत्रज्ञान मेळा सलग चार दिवस म्हणजे सोमवारी (ता.१३) सायंकाळपर्यंत चालू राहणार आहे. प्रदर्शनात प्रवेश सर्वांसाठी विनामूल्य आहे.

प्रदर्शनात दररोज बक्षिसाची सोडत

‘अॅग्री एक्स्पो २५’ या कृषी प्रदर्शनात येणाऱ्या शेतकऱ्यांना दररोज ट्रॅक्टरचलित पेरणी यंत्राचे बक्षीस जिंकण्याची संधीदेखील मिळणार आहे. त्यासाठी दररोज एका भाग्यवान शेतकऱ्याला सोडत काढून पेरणी यंत्र भेट दिले जाणार आहे.

- प्रदर्शनाचे स्थळ ः जालना रोडवरील केंब्रिज स्कूलजवळ असलेल्या श्रीराम मंदिर ट्रस्टचे मैदान.

- वेळ ः सकाळी दहा ते सायंकाळी सात वाजेपर्यंत

- कालावधी ः शुक्रवार ता. १० ते सोमवार ता. १३ पर्यंत.