Pune News : मागील वर्षी राज्याच्या अनेक भागात सरासरीपेक्षा कमी प्रमाणात पाऊस पडला आहे. त्यामुळे बहुतांश भागात दुष्काळ परिस्थिती निर्माण झाली. तसेच राज्यातील अनेक प्रकल्पांमध्ये खूप कमी प्रमाणात पाणीसाठा उपलब्ध आहे. मराठवाड्यात तर मोठ्या धरणांमध्ये केवळ ३६ टक्के पाणीसाठा शिल्लक असून येथे ३१९ टँकरने पाणीपुरवठा सुरू आहे. यादरम्यान विदर्भातील गोंदिया जिल्ह्यात सुदैवाने सध्यातरी पाणीटंचाई दिसून आलेली नाही. तरीही वाढती उष्णता आणि इतर जिल्ह्यातील दुष्काळी स्थिती पाहता पाण्याच्या योग्य नियोजनाकडे जिल्हा आपत्ती व्यवस्थापनाने लक्ष घातले आहे.

राज्यातील अनेक धरणातील पाणीसाठ्याने मार्चच्या सुरूवातीलाच तळ गाठण्यास सुरूवात केली आहे. अजूनही उन्हाळा बाकी असून पावसाळ्याला तीन महिने शिल्लक आहेत. दरम्यान अनेक जिल्ह्यांमध्ये दुष्काळी स्थिती निर्माण झाली आहे.

मात्र गोंदिया जिल्ह्यात सध्यातरी हवामान थंड असून उष्णता वाढलेली नाही. तर येथील प्रमुख तीन धरणात पाण्याचा साठा हा ५० टक्क्यांहून अधिक असून जिल्ह्याचा विचार केल्यास सरासरी ५४ टक्के पाणीसाठा उपलब्ध असल्याची माहिती गोंदिया जिल्हा आपत्ती व्यवस्थापन अधिकारी राजन चौबे यांनी दिली आहे.

सध्या गोंदिया जिल्ह्यामध्ये सरासरी ५४ टक्के पाणीसाठा उपलब्ध आहे. यामध्ये गोंदिया जिल्ह्यातील प्रमुख धरणांपैकी पुजारीटोला धरणामध्ये ६० टक्के, शिरपूर धरणामध्ये ५३ टक्के तर इटियाडोह धरणामध्ये ५८ टक्के पाणीसाठा उपलब्ध असल्याचेही माहिती चौबे यांनी दिली आहे.

राज्यातील अनेक जिल्ह्यात पाणीटंचाई जाणवत आहे. मात्र सुदैवाने गोंदियात सध्या पाण्याची टंचाई दिसून आलेली नाही. मात्र येणाऱ्या दिवसात परिस्थिती कशी निर्माण होईल हे सांगता येत नाही. यामुळे गोंदिया जिल्हा आपत्ती व्यवस्थापन आधिच अलर्टमोडवर असून पाण्याच्या योग्य नियोजनाकडे लक्ष दिले जात आहे.