ॲग्रोवन वृत्तसेवा
Pune News : उरुळी कांचन, जि.पुणे ः गुणवत्तापूर्ण दूध उत्पादन वाढ आणि जातिवंत पैदाशीसाठी आनुवंशिक सुधार कार्यक्रम महत्त्वाचा आहे. तसेच पशू आहार आणि आरोग्य व्यवस्थापन करून अधिक दूध उत्पादन शक्य होईल. तसेच प्रती लिटर दूध उत्पादनामागे मिथेन उत्सर्जन कमी करणे शक्य होईल, असे मत अमेरिकेतील बिल अॅण्ड मिलिंडा गेट्स फाउंडेशनचे वरिष्ठ कार्यक्रम अधिकारी डॉ. आल्फ्रेड डी. वॅरीज यांनी मांडले.

बाएफ संस्थेचा ५८ वा वर्धापन दिन सोमवारी (ता.२६) उरुळी कांचन येथे उत्साहात साजरा करण्यात आला. या कार्यक्रमासाठी प्रमुख पाहुणे म्हणून डॉ. आल्फ्रेड डी. वॅरीज उपस्थित होते. कार्यक्रमाच्या सुरुवातीला वरिष्ठ उपाध्यक्ष डॉ. अशोक पांडे यांनी मान्यवरांचे स्वागत केले. अध्यक्ष डॉ. भरत काकडे यांनी बाएफ संस्थेच्या विविध राज्यातील कार्यक्रमांचा आढावा घेतला. याचबरोबर भविष्यकाळात राबविण्यात येणाऱ्या आणि सुरुवात केलेले महत्वाकांक्षी प्रकल्प, रूरल इनोव्हेशन पार्क, हरित ऊर्जा प्रकल्प, बायोलेदर प्रकल्प, जनावरांचा आनुवंशिक दर्जा सुधारण्यासाठी प्रयोगशाळेत आयव्हीएफ तंत्रज्ञानाचा वापर, आधुनिक शेतीसाठी कृत्रिम बुद्धिमत्ता आणि डिजिटल तंत्रज्ञानाचा वापर आणि वातावरण बदलासाठी विशेष उपक्रमांची माहिती दिली.

डॉ. वॅरीज यांनी संस्थेच्या विविध संशोधन प्रकल्पांस भेट देऊन माहिती घेतली. पशुसंवर्धन आणि पशूंच्या आनुवंशिक अभ्यासाचे कौतुक करून संस्थेसोबत विविध संशोधनात्मक कार्यामध्ये सहभागी होणार असल्याचे त्यांनी सांगितले. कार्यक्रमामध्ये मान्यवरांच्या हस्ते विविध राज्यांतील महिला बचत गटांना डॉ. मणिभाई देसाई गौरव पुरस्कार आणि विजयाताई देशमुख स्मृती पुरस्काराने गौरविण्यात आले.

उत्कृष्ट काम केलेले शेतकरी आणि महिलांना अरविंदभाई मफतलाल किसान मित्र आणि गोपाल सेवा पुरस्काराने सन्मानित करण्यात आले. तसेच विशेष संशोधन केलेले संस्थेचे कर्मचारी, गुणवंत कामगार, विविध परीक्षांमध्ये चांगल्या गुणांनी उत्तीर्ण झालेली कर्मचाऱ्यांच्या मुलांचा मान्यवरांच्या हस्ते सन्मान करण्यात आला. कार्यक्रमादरम्यान मान्यवरांच्या हस्ते विविध संशोधन पुस्तिका आणि वार्षिक अहवालाचे प्रकाशन करण्यात आले. कार्यक्रमामध्ये संस्थेचे उपाध्यक्ष श्रीनिवास कुलकर्णी, सुजित गिजरे, अलोक जुनेजा तसेच संस्थेतील तज्ज्ञ आणि शेतकरी उपस्थित होते. डॉ. संस्थेचे उपाध्यक्ष डॉ.जयंत खडसे यांनी आभार मानले. प्राजक्ता देशमुख यांनी कार्यक्रमाचे सूत्रसंचालन केले.