Latur News : जिल्ह्यात रोहित्र (डीपी) वारंवार नादुरुस्त होत असल्याच्या तक्रारी आहेत. भार वाढल्याने नादुरुस्तीचे प्रमाण अधिक आहे. त्यामुळे या रोहीत्रांची क्षमता वाढविण्यासाठी निधी द्यावा, अशी मागणी पालकमंत्री शिवेंद्रसिंहराजे भोसले यांनी बुधवारी (ता. पाच) जिल्हा वार्षिक योजना राज्यस्तरीय बैठकीत त्यांनी ही मागणी लावून धरली.

उपमुख्यमंत्री तथा अर्थमंत्री अजित पवार यांनी जिल्ह्याच्या विकासासाटी मंजूर नियतव्ययापेक्षा जास्तीचा निधी देण्याचा प्रयत्न करण्यात येईल, असे सांगितले. यासोबत गंजगोलाई हे लातूरचे ऐतिहासिक वैभव असून गंजगोलाईला जोडणारे रस्ते आणि परिसराच्या सुशोभीकरणाला निधी उपलब्ध करून देण्यात येईल. या कामाचा सविस्तर आराखडा सादर करावा, अशा सूचना पवार यांनी दिल्या.

दूरदृश्यप्रणालीद्वारे झालेल्या या बैठकीला पालकमंत्री भोसले, सहकारमंत्री बाबासाहेब पाटील, वित्त व नियोजन राज्यमंत्री आशिष जयस्वाल, आमदार संजय बनसोडे, जिल्ह्याच्या पालक सचिव मनीषा म्हैसकर यांच्यासह जिल्हाधिकारी वर्षा ठाकूर-घुगे, मुख्य कार्यकारी अधिकारी अनमोल सागर, महापालिका आयुक्त बाबासाहेब मनोहरे, अतिरिक्त मुख्य कार्यकारी अधिकारी असलम तडवी, जिल्हा नियोजन अधिकारी सोमनाथ रेड्डी, सहायक आयुक्त शिवकांत चिकुर्ते व अधिकारी उपस्थित होते.

गंजगोलाईकडे जाणारे रस्ते आणि परिसराचे सुशोभीकरण करताना या वास्तूचे ऐतिहासिक महत्त्व लक्षात घेऊन त्यानुसार आराखडा तयार करावा. या आराखड्यात समाविष्ट कामे गंजगोलाईचे ऐतिहासिक स्थान अधोरेखित करणारी, या वास्तूला साजेशी आणि दर्जेदार होतील, याची दक्षता घ्यावी, अशा सूचना पवार यांनी केल्या.

शहर आणि शहराच्या आजूबाजूचा परिसर स्वच्छ राहण्यासाठी तातडीने उपाययोजना हाती घ्याव्यात. समन्वयाने काम करून शहर स्वच्छ राहील, यासाठी प्रयत्न करावेत. तसेच नागरिकांना चांगल्या सुविधा उपलब्ध करून देण्यावर भर द्यावा, असेही त्यांनी यावेळी सांगितले.