Nashik News : उन्हाळ्यात दिवसेंदिवस वाढणाऱ्या तापमानाचा जसा परिणाम नागरिकांवर होत आहे. तसाच तो जनावरांवर होत असल्याने जनावरांना उन्हाचा त्रास कमी व्हावा या उद्देशाने कळवण येथील शेतकरी रवींद्र दामू पगार यांनी गोठ्यामध्ये फॉगर सिस्टीम बसविली. यामुळे गोठा थंड राहत असून जनावरांवर उन्हाचा त्रास होत नसल्याने श्री. पगार यांनी सांगितले.

कळवण तालुक्यात उन्हाळा तीव्र असल्यामुळे जनावरांनाही याचा त्रास होतो आहे. वाढत्या उन्हामुळे त्याचा विपरित परिणाम दूध उत्पादनावर, जनावरांच्या पोषणावर तसेच प्रजननक्षमतेवर होत असतो. दूध देणाऱ्या जनावरांना थंड हवामान मानवते. जर जनावरे सतत उन्हाच्या संपर्कात येत असतील, तर त्याच्या आरोग्यावर विपरित परिणामदेखील दिसून येतो.

त्यामुळे गोठ्या जनावरे बांधल्यानंतर त्यांना उन्हाचा त्रास कमी व्हावा या हेतूने श्री. पगार यांनी गोठ्यातच ‘फॉगर’ प्रणाली लावली आहे. ‘फॉगर’मुळे गोठा थंड राहतो. ‘फॉगर’मधून जे पाणी बाहेर येते ते पाणी हवेमध्ये मिसळून जाते. त्यामुळे जनावरे किंवा चारा भिजत नाही. वीज नसेल तर ही प्रणाली बॅटरीवरही चालवता येते. गोठ्याच्या आकारानुसार ही प्रणाली बसवता येते.

उन्हाळ्यात जनावरांना अल्प खाद्य, कमी व वाळलेला चारा, अल्प पाणी व अति उष्णता यांचा त्रास होतो. जगण्यासाठी आवश्यक त्याच शरीरक्रियांचा बराच ताण असतो. तीव्र उन्हामुळे प्रजननक्रिया थांबते अथवा त्यास हानी पोहोचते. मार्च ते जून या काळात वातावरणातील उष्णता फार वाढते. त्यामुळे जनावरांची योग्य काळजी घेणे गरजेचे असते. यासाठी उन्हाळ्यात जनावरांना गोठा अथवा सावलीत बांधणे, त्यांना मुबलक व स्वच्छ पाणी देणे महत्त्वाचे असते.