Nashik News: अतिवृष्टीमुळे नाशिक जिल्ह्यात पिकांना मोठा फटका बसला आहे. ज्यामध्ये कांदा रोपवाटिकांचे मोठे नुकसान झाले आहे. कांदा रोपांची अवस्था बिकट झाल्याने लागवडीसाठी रोपे उपलब्ध होण्यास अडचण निर्माण होणार आहे.
गेल्या महिन्यापासून कांद्याच्या दरात सुधारणा व सिंचन सुविधा उपलब्ध झाल्याने शेतकऱ्यांचा कांदा लागवडीकडे कल दिसून आला. शेतकऱ्यांनी महागडे कांदा बियाणे घेऊन कांदा रोपवाटिकांची उभारणी केली; मात्र ऑक्टोबर महिन्याच्या दुसऱ्या सप्ताहात ११ ते १३ ऑक्टोबर दरम्यान झालेल्या पावसामुळे कांदा रोपांची अतोनात हानी झाली आहे. सपाट वाफ्यांमध्ये रोपांचे सर्वाधिक नुकसान असून, काही प्रमाणात गादी वाफ्यांमधील रोपांचे नुकसान आहे.
सलग तीन ते चार दिवस झालेल्या पावसाने प्रामुख्याने मालेगाव, सटाणा, कळवण, देवळा, येवला, चांदवड, नांदगाव व सिन्नर तालुक्यांतील कांदा उत्पादक पट्ट्यात रोपवाटिका मोठ्या प्रमाणात बाधित झाल्याचे दिसून येत आहे. मातीतील बुरशीजन्य रोगांचा विळखा वाढला असून, वाचलेली थोडीफार रोपेही नुकसानीच्या विळख्यात सापडली आहे.
एकीकडे कांदा रोपवाटिका उभारणी करण्यापूर्वीच कांदा बियाण्यांची टंचाई होती. त्यातच आता पुन्हा नुकसान झाल्याने बियाणे आणायचे कुठून, हा मोठा प्रश्‍न कांदा उत्पादक शेतकऱ्यांसमोर आहे. त्यामुळे पुन्हा बियाण्यांची शोधाशोध करून व दुबार खर्च करून कांदा रोपवाटिका शेतकऱ्यांना करावा लागणार आहे.
दिसून येत असलेले नुकसान :
- उपळलेल्या शेतात पाणी असल्याने रोपवाटिका बाधित.
- पाने पिवळी पडून रोपे खराब.
- रोपांच्या खालील भागात मूळकुज.
- नवीन रोपवाटिकेमध्ये लहान रोपे मातीखाली.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
