Sangli News: सांगली जिल्ह्यातील बड्या नेत्यांशी संबंधित असलेल्या पाच सूतगिरण्यांच्या सांगली जिल्हा मध्यवर्ती बँकेने थकित कर्ज वसुलीसाठी मालमत्ता विक्रीसाची तिसऱ्यांदा लिलाव प्रक्रिया सुरू केली आहे. या सूतगिरण्यांकडे तब्बल १३४.४२ कोटी रुपयांचे मुद्दल असून त्यावरील व्याज वेगळे आहे. जिल्हा मध्यवर्ती बँकेतर्फे तिसऱ्यांदा लिलाव प्रक्रिया सुरू केली जाणार असून, ३० जूनपर्यंत निविदा मागवल्या असल्याची माहिती बँक प्रशासनातर्फे दिली.

जिल्हा बँकेच्या कर्जाची थकबाकी वसुलीसाठी बँकेने स्वामी रामानंद भारती सहकरी सूतगिरणी तासगाव, खानापूर तालुका को-ऑप. स्पिनिंग मिल्स विटा, शेतकरी विणकरी सहकारी सूतगिरणी इस्लामपूर, प्रतिबिंब मागासवर्गीय को-ऑप. इंडस्ट्रीज, इस्लामपूर व विजयालक्ष्मी कॉटन मिल्स, आटपाडी या पाच सूतगिरण्यांच्या मालमत्ता विक्रीसाठी निविदा मागवल्या होत्या.

या सर्व सूतगिरण्यांकडे डिसेंबर २०२४ अखेर केवळ मुदलाची १३४ कोटी ४२ लाख ५२ हजार रुपये थकबाकी आहे. या संस्थांच्या लिलावासाठी निविदा दाखल करण्याची अंतिम मुदत २० फेब्रुवारीपर्यंत होती. मात्र एकच निविदा दाखल झाली होती, त्यामुळे प्रक्रिया रद्द करावी लागली. बँकेने सेक्युरिटायझेशन अॅक्टअंतर्गत या सर्व सूतगिरण्या ताब्यात घेतल्या आहेत.

बँकेने याआधी या सर्व संस्थांचा लिलाव जाहीर केला होता. मात्र त्याला प्रतिसाद मिळाला नाही. शेतकरी विणकरी, प्रतिबिंब मागासवर्गीय व विजयालक्ष्मी कॉटन मिल या तीन सूतगिरण्या जिल्हा बँकेने मार्च २०२० मध्ये स्वतः खरेदी केल्या आहेत. त्यामुळे बँकेला या संस्थांकडील कर्जवसुली करावी लागणार आहे. २१ मे ते ११ जून या कालावधीत निविदा अर्ज उपलब्ध होतील. ३० जूनपर्यंत निविदा दाखल करण्याची मुदत आहे.

...या सूत गिरण्यांकडे थकबाकी

स्वामी रामानंदभारती सहकरी सूतगिरणी, तासगाव ४५.८१ कोटी, शेतकरी विणकरी सूतगिरणी इस्लामपूर ४९.३१ कोटी, खानापूर तालुका को-ऑप. स्पिनिंग मिल्स, विटा १७.९९ कोटी, प्रतिबिंब मागासवर्गीय इंडस्ट्रीज, इस्लामपूर ७.५५ कोटी व विजयालक्ष्मी कॉटन मिल्स, आटपाडी यांची १३.७४ कोटी रुपयांच्या थकबाकीचा समावेश आहे.