Palghar News : शहापूर तालुक्यात २०११मध्ये झालेल्या दारिद्र्य रेषेच्या सर्व्हेचा सर्वांत अधिक फटका दारिद्र्यरेषेखालील लोकांना सहन करावा लागत आहे. त्याचे परिणाम ते १४ वर्षांपासून भोगत आहेत.

मुळातच ज्याचे उत्पन्न जास्त, ज्या घरातील कुटुंबप्रमुख अथवा सरकारी नोकरीला किंवा आलिशान बंगले, घरे, दारात वाहने, मोठमोठे उद्योग व्यवसाय, व्यावसायिक वाहने असलेल्या कुटुंबाची नावे दारिद्र्यरेषेत आली आहे. गरजवंत कुटुंबे मात्र यात वंचित राहिली आहेत.

शहापुरातील दारिद्र्याखाली जगणाऱ्या आदिवासी कुटुंबांना या सर्व्हेचा मोठा फटका बसला आहे. त्यांची नावे न आल्याने किंवा ती दुरुस्त करण्याचा अधिकारही कोणाला नसल्याने त्यात कोणताही बदल करता आला नाही. परिणामी, सरकारी योजनांचा फायदा वंचित राहिलेल्या गरजू-गरीब लोकांना मिळालेला नाही.

दारिद्र्यरेषेखालील कुटुंबाची संख्या १८ हजार ५०६ इतकी आहे. या कुटुंबातील नागरिकांचे जीवनमान सुधारण्यासाठी अनेक महत्त्वांच्या योजना आहेत. या योजनांचा लाभ त्यांना मिळण्याऐवजी अपात्र लाभार्थीच जास्त फायदा घेताना दिसत आहेत. तालुक्यातील अनेक दारिद्र्यरेषेखालील कुटुंबांना शासकीय योजनेचा फायदा घेण्यासाठी दारिद्र्यरेषेचा सर्व्हे करण्याची गरज असून तशी मागणी वाढत आहे.

दारिद्र्यरेषेखालील कुटुंबातील सदस्यांना सरकारतर्फे विविध योजना लागू आहेत. स्वस्त धान्य, मोफत आरोग्य, शिक्षण, विमा, पंचायत समिती, आदिवासी विकास विभागाचे प्रकल्प कार्यालय जव्हार इत्यादी ठिकाणच्या योजनांमध्ये सवलत; तसेच इतरही योजनांचा लाभ कुटुंबांना मिळत असतो; मात्र काही गरजवंत कुटुंबे ही दारिद्र्यरेषेबाहेर असल्याने त्यांना याचा फायदा होत नाही.

स्वस्त धान्य दुकानावर दृष्टिक्षेप

शहापूर तालुक्यात १७१ स्वस्त धान्य दुकाने आहेत.

अंत्योदय योजना शिधापत्रिका -

लाभार्थी : १८५८८ तांदूळ - २५ किलो गहू-१०किलो

प्राधान्य कुटुंब योजना शिधापत्रिका -

लाभार्थी : ३२३३३ तांदूळ -४ किलो गहू - १ किलो

केशरी शिधापत्रिका -

लाभार्थी : १४५३० शिधापासून वंचित

शुभ्र शिधापत्रिका -

लाभार्थी : १८४८ शिधापासून वंचित