Shrirampur Onion News : अवकाळी पावसाने कांदा पिकाचे अतोनात नुकसान झाले आहे. ज्या शेतकऱ्यांनी शेतातील पोळीत कांदा झाकून ठेवला आहे, त्यांची तो चाळीत साठविण्याची लगबग सुरू आहे.

राज्यात वादळी वारा व गारपिटीसह अवकाळी पावसाने धुमाकूळ घातला आहे. पुढील दोन ते तीन दिवस पुन्हा अवकाळी पावसाची शक्यता हवामान विभागाने वर्तविला असल्याने शेतकऱ्यांच्या तोंडचे पाणी पळाले आहे.

अगोदरच भरमसाट खर्च करूनही पिके हातात पडले नाहीत. त्यातच अवकाळी पावसाने पुन्हा होत्याचे नव्हते होत असल्याने शेतकरी आर्थिक संकटात सापडलेला आहे.

निसर्गाच्या कोपातून वाचलेल्या मालाचे पदरात काहीतरी पडेल, या आशेने शेतकऱ्यांनी कंबर कसली आहे.

अतिवृष्टीमुळे सोयाबीन, कपाशी तर अवकाळी पावसाने गहू, हरभरा, कांदा, द्राक्ष, भाजीपाला पिकांचे नुकसान झाले आहे. मात्र सरकारकडून अद्याप कुठलीही आर्थिक मदत मिळालेले नाही.

फक्त अवकाळी पावसाबरोबरच राज्यकर्त्यांचा घोषणांचा पाऊस सुरू आहे. त्यामुळे शेतकऱ्यांतून संताप व्यक्त होत आहे.