Nashik News : शेतकऱ्यांच्या मालाचे बुकिंग आणि प्रवाशांच्या सोयीसाठी मध्य रेल्वे प्रशासनाने देवळाली ते दानापूर शेतकरी समृद्धी स्पेशल ट्रेन वेळापत्रकानुसार चालवण्याचा निर्णय घेतला आहे. ही ट्रेन मध्यंतरीच्या काळात काही दिवस बंद होती. आता रिसर्च अँड डेव्हलपमेंट (संशोधन व विकास) या तत्त्वावर ही ट्रेन चालू केली आहे.

शेतकरी समृद्धी स्पेशल ट्रेन सुरू झाल्यामुळे नाशिकचे द्राक्ष, आंबे, डाळिंब, पालेभाज्या, फळभाज्या, तांदूळ, गहू, कांदा, वाइन, पेरू, कोबी, मिरच्या या परराज्यात जलद पोचणार आहेत. पर्यायाने शेतकऱ्यांच्या मालाला हायटेक भाव मिळेल. त्यामुळे व्यापारी आणि शेतकरी या ट्रेनची पार्सल बुकिंगसाठी रेल्वे स्थानक परिसरात गर्दी करीत आहेत.

या शेतकरी समृद्धी स्पेशल ट्रेनमध्ये १० सामान्य द्वितीय श्रेणी, १० पार्सल व्हॅन आणि तीन स्लीपर बोगी आहेत. यामुळे दानापूर आणि पाटण्याकडे जाणाऱ्या प्रवाशांची अतिरिक्त गर्दी कमी होईल.

त्यामुळे शेतकरी आणि मजूर दोघांनाही प्रवासाची सुविधा मिळणार आहे. नाशिक रोड, मनमाड जंक्शन, जळगाव, भुसावळ जंक्शन, बऱ्हाणपूर, खंडवा, इटारसी, जबलपूर, सतना, कटनी, प्रयागराज, छिवकी, पंडित दीनदयाळ उपाध्याय जंक्शन, बक्सर आणि आराह येथे ट्रेनचे थांबे असणार आहेत.

लोडिंगसाठी प्रमुख थांबे

नाशिक ते दानापूर अंतर १,५०९ किमी

मनमाड ते दानापूर अंतर १,४३६ किमी

भुसावळ ते दानापूर अंतर १,२५२ किमी