Pune News : भोर तालुक्यात सध्या भात काढणीची कामे अंतिम टप्प्यात आली आहेत. परंतु शुक्रवार (ता. १५) सकाळपासूनच ढगाळ हवामान असल्याने कोणत्याही क्षणी पाऊस पडेल या भीतीने शेतात कापून ठेवलेले भात भिजू नये म्हणून कापलेले भात गोळा करून सुरक्षित ठिकाणी ठेवताना शेतकऱ्यांची तारांबळ उडाली असल्याचे पाहायला मिळाले.

भोर तालुक्यात भात हेच प्रमुख पीक असून भात काढणी सध्या अंतिम टप्प्यात आली आहे. पश्‍चिम भागातील नांदगाव, वाठार, पिसावरे, वेनवडी, शिरवली तसेच आंबवडे खोऱ्यातील ज्या शेतकऱ्यांचे दोन दिवसांत भात कापून वाळण्यासाठी खाचरातच होते.

ढगाळ वातावरणामुळे ते भिजू नये म्हणून हातातील इतर कामे सोडून शेतकरी खाचरातील कापलेले भात गोळा करून ट्रॅक्टर, बैलगाडीच्या सहाय्याने सुरक्षित ठिकाणी नेताना त्यांची धांदल उडाली.

तर काहींनी कापलेले भात खाचराजवळच एकत्र रचून प्लास्टिक कागदाने झाकतानाची लगबग दिसून येत होती.

तसेच बऱ्याच शेतकऱ्यांनी मजूर व यंत्राअभावी कापलेल्या भाताच्या झोडणी न करताच गंजी रचल्या आहेत. ढगाळ हवामानामुळे पावसाच्या भीतीने गंजी प्लास्टिक कागदाने झाकण्याचा प्रयत्न करताना दिसत होते.