Nagpur News : नैसर्गिक आपत्तीमुळे कमी झालेली उत्पादकता त्यासोबतच बाजारात शेतीमालाला कमी मिळणारा दर यामुळे पीककर्जाची परतफेड करणे शक्‍य न झालेल्या एका शेतकऱ्याच्या जमिनीचा बॅंकेद्वारा ताबा घेण्याचा धक्‍कादायक प्रकार समोर आला आहे. आत्महत्याग्रस्त यवतमाळ जिल्ह्यात घडलेल्या या प्रकारामुळे बॅंकेच्या पठाणी वसुली धोरणाविरोधात असंतोष व्यक्‍त केला जात आहे.

यवतमाळ जिल्ह्यात खरिपाखालील सुमारे ९ लाख हेक्‍टर क्षेत्र असून त्यातील सर्वाधिक पाच लाख हेक्‍टरवर कापसाची लागवड होते. सिंचन सोयींचा अभाव असल्याने कापसाची उत्पादकता देखील जेमतेम आहे. या उत्पन्नातून कौटुंबिक गरजांसोबतच पीककर्जाची परतफेड करण्याचे आव्हान शेतकऱ्यांसमोर राहते. त्यात यश येत नसल्याने शेतकरी आत्महत्यांचे प्रकार घडतात.

अशातच आता बॅंकेच्या पठाणी वसुलीचा प्रकार समोर आला आहे. महागाव तालुक्‍यातील पेढी गावचे हरी सेवा पवार यांच्याकडे संयुक्‍त कुटुंबाची २७ एकर जमीन. त्यातील २.९२ हेक्‍टर क्षेत्राच्या माध्यमातून त्यांनी २०१२ साली जिल्हा बॅंकेकडू तीन लाख ५६ हजार ६९१ रुपये रुपये कर्ज घेतले होते. या कर्जाचा भरणा त्यांना शक्‍य झाला नाही.

परिणामी मुद्दलासह व्याज मिळून ही रक्‍कम आता ६ लाख ७० हजार ०५७ रुपयांवर पोहचली आहे. कर्ज रक्‍कम अधिक असल्याने छत्रपती शिवाजी महाराज सन्मान योजना, महात्मा ज्योतिबा फुले कर्जमुक्‍ती योजना या दोन्ही योजनांचा लाभ त्यांना मिळू शकला नाही.

परिणामी या थकीत कर्जाच्या वसुलीसाठी आता बॅंकेकडून त्यांच्या २.९२ हेक्‍टर क्षेत्राचा सांकेतिक ताबा घेण्यात आला आहे. त्यासंबंधीची प्रक्रिया नुकतीच बॅंकेकडून पूर्णत्वास गेल्याने शेतकऱ्यांमध्ये असंतोष निर्माण झाला आहे.

सदर मालमत्तेसंदर्भात कोणीही व्यवहार करू नये, केल्यास स्थावर मालमत्ताधारकावर कारवाई केली जाईल, असा इशारा यवतमाळ जिल्हा बॅंक प्रशासनाकडून जाहिरात प्रकाशित करून देण्यात आला आहे. त्यामुळे शेतकऱ्यांसमोरील अडचणीत वाढ झाली आहे.