Beed News : शेतकऱ्यांना देशोधडीला लावणाऱ्या शक्तिपीठ महामार्गास शेतकऱ्यांचा कडाडून विरोध होत असून राज्य सरकारने हा प्रस्तावित महामार्ग तत्काळ रद्द करावा, यासाठी बीड जिल्ह्यातील परळी, अंबाजोगाई तालुक्यांतील शेतकऱ्यांनी मंगळवारी (ता. १) कृषी दिनी अनेक ठिकाणी रास्तारोको करून या महामार्गास तीव्र विरोध केला.

अंबाजोगाई तालुक्यातील बर्दापूर, धायगुडा पिंपळा आणि परळी तालुक्यातील तळेगाव या ठिकाणी शेतकरी महिला आणि त्यांच्या कुटुंबीयांनी एकत्र येत रास्तारोको केला.

धायगुडा पिंपळा या ठिकाणी आंदोलन करणाऱ्या शेतकरी पुरुष महिलांना अटक करून दुपारी सोडण्यात आले. किसान सभेचे ॲड. अजय बुरांडे, मुरलीधर नागरगोजे, भाई मोहन गुंड, भगवान बडे, मदन वाघमारे व्यंकट ढाकणे, सुशील शिंदे, मारुती इरलापल्ले, ॲड.

जावेद पटेल, दीपक शिंदे, अरुण पाटील, पुंडलिक धायगुडे, बावणे विठ्ठल, मीना डांगे, आशा पवार, भानुदास मुंडे, मारुती डांगे यांच्या प्रमुख उपस्थितीत शेकडो शेतकरी या ठिकठिकाणी रास्तारोको आंदोलनात सहभागी झाले होते.

या वेळी किसान सभेचे ॲड. अजय बुरांडे म्हणाले की, सरकार शेतकरीविरोधी भूमिका घेत आहे. शक्तिपीठ महामार्गाच्या सीमांकन आणि जमीन संपादनासाठी पोलिसी बळाचा वापर करत आहे. अधिकारी देखील शेतकऱ्यांना धमक्या देण्याचा प्रकार बीड जिल्ह्यात सुरू आहे. सत्तेचा आणि बळाचा हा गैरवापर आहे.