Nagar News : दादा पाटील शेळके नगर तालुका बाजार समितीच्या नेप्ती उपबाजारात गुरुवारी (ता. ९) खरेदीदारांकडून कांद्याचे दर पाडल्यानंतर संतप्त शेतकऱ्यांनी आंदोलन करत घोषणाबाजी केली. शेतकऱ्यांचा संताप पाहून पुन्हा दरात वाढ केली गेली. त्यामुळे व्यापारी कांदा खरेदीबाबत दिशाभूल करीत असल्याचा आरोप शेतकऱ्यांनी केला आहे. संगमनेर, घोडेगाव, पारनेर येथेही दोन दिवसांपूर्वी शेतकऱ्यांनी कांदा दराबाबत संताप व्यक्त केला आहे.

केंद्र सरकारने ४ मे रोजी कांदा निर्यातीवरील बंदी हटवल्याचे जाहीर केले. त्यानंतर संपूर्ण राज्यात कांद्याच्या दरात वाढ झाली. दरवाढ झाल्याचे दिसताच शेतकऱ्यांनी बाजारात कांदा विक्रीला आणायला सुरुवात केली. नगरला सोमवारी (ता. ६) झालेल्या लिलावाला विक्रमी १ लाख ३७ हजार २५८ गोण्या कांद्याची आवक झाली.

त्या दिवशी एक नंबर कांद्याला २१०० रुपये क्विंटलपर्यंत दर मिळाला. त्यामुळे गुरुवारी (ता. ९) शेतकऱ्यांनी मोठ्या प्रमाणात कांदा विक्रीसाठी आणला होता. मात्र लिलाव सुरू झाल्यावर कांद्याचे दर पडल्याचे दिसले. सोमवारच्या तुलनेत प्रति क्विंटल १ हजार ते बाराशे रुपयांनी दर कमी मिळत असल्याचे दिसताच उपस्थित शेतकऱ्यांनी संताप व्यक्त करत घोषणाबाजी सुरू केली.

शेतकऱ्यांनी आंदोलनाची भूमिका घेतल्यानंतर पुन्हा लिलावात १२०० रुपयांवरून दर १७०० रुपयांपर्यंत गेले. त्यामुळे या मागील नेमके गौडबंगाल काय, असा प्रश्‍न शेतकरी उपस्थित करत होते. त्यानंतर तालुक्यातील नेत्यांनी येथे येऊन शेतकऱ्यांच्या आंदोलनात सहभाग घेतला. शेतकरी प्रतिनिधींनी जिल्हा उपनिबंधक कार्यालयात जाऊन निवेदन दिले, व दर कसे काय पाडले याची चौकशी करून कारवाई करण्याची मागणी केली.

सत्ताधारी, अडत- व्यापाऱ्यांचे संगनमत

लोकसभा निवडणुकीच्या काळात सरकारने कांदा निर्यात बंदी उठवली. केंद्र सरकार महाराष्ट्रातील शेतकऱ्यांना देशोधडीला लावत आहे. दोन दिवसांपूर्वी २१०० रुपये भाव मिळालेला असताना अचानक ८०० ते ९०० रुपयांवर दर येतोच कसा, यामध्ये अडते- व्यापारी लॉबिंग करत असून सत्ताधारी आणि अडत-व्यापाऱ्यांचे मिलीभगत असल्याचा आरोप या वेळी शेतकऱ्यांनी केला असून, चौकशी करून कारवाईची मागणी केली आहे.