Nashik News : दुष्काळी स्थितीत कांदा पीक जगविले. काढणीला आला तर गारपिटीने नुकसान केले. अशा परिस्थितीत दोन पैसे मिळत होते, मात्र केंद्र सरकारने पुन्हा राजकारणासाठी शेतकऱ्यांचा घात केला. त्यामुळे ही निर्यातबंदी मागे घ्या; नाहीतर २०२४ च्या निवडणुकीमध्ये गाठ आमच्याशी आहे, असा इशारा कांदा उत्पादकांनी दिला.

कांदा निर्यातबंदी विरोधात प्रहार शेतकरी संघटनेतर्फे जिल्हाध्यक्ष गणेश निंबाळकर यांच्या नेतृत्वाखाली केंद्रीय राज्यमंत्री डॉ. भारती पवार यांच्या घरावर डेरा आंदोलन पुकारले होते. त्यानुसार रविवारी (ता.१०) चांदवड, देवळा, कळवण, सटाणा, येवला, नांदगाव तालुक्यांतील शेकडो कार्यकर्ते व शेतकरी नाशिकला आले.

पोलिसांनी आंदोलकांना अशोकस्तंभ परिसरात अडविले. त्यावेळी कार्यकर्ते संतापले. केंद्र सरकारविरोधात घोषणाबाजी करण्यात आली. कांद्याच्या माळा गळ्यात घालून ‘निर्यातबंदी मागे घ्या’ अशी घोषणाबाजी करण्यात आली. अखेर डॉ. पवार यांच्याशी निंबाळकर यांचे फोनवरून बोलणे झाले.

‘‘मी तुमच्या मुद्द्यासाठी आग्रही असून निर्यातबंदी मागे घेण्यासाठी प्रयत्न करत आहे. यावर लवकर तोडगा निघेल हा तुम्हाला शब्द देते,’’ असे आश्वासन त्यांनी दिले. त्यांनतर आंदोलकांनी जिल्हाधिकारी कार्यालयाच्या मुख्य प्रवेशद्वारासमोर ठिय्या दिला. या ठिकाणी जिल्हा उपनिबंधकांना मागण्यांचे निवेदन देण्यात आले.

प्रमुख मागण्या...

- २५ टक्के अग्रिम पीकविमा व पीक कापणी प्रयोगाद्वारे संपूर्ण परतावा द्या

- दुष्काळ व गारपिटीचे अनुदान एकरकमी अदा करावे

- नाफेडची कांदा खरेदी रद्द करावी