Solapur News : कासेगाव (ता. पंढरपूर) येथील मे. महालक्ष्मी फर्टिलायझर्स एल.एल.पी. या खत उत्पादक कंपनीच्या गोदामावर कृषी विभागाने धाड टाकत ११ लाख ३३ हजार ८५० रुपये किमतीचा बनावट खत साठा जप्त केला आहे.

जिल्हा अधिक्षक कृषी अधिकारी शुक्राचार्य भोसले, जिल्हा परिषदेचे कृषी विकास अधिकारी हरिदास हावळे यांच्या पथकाने ही कारवाई केली. या प्रकरणी संचालक सुदीप सुरेश साळुंखे (रा. थेरगाव, ता. मुळशी, जि. पुणे) व संचालक योगेश बाळकृष्ण जाधव (रा. हंडी निमगाव, ता. नेवासा, जि. अहिल्यानगर) आणि महालक्ष्मी फर्टिलायझर एल.एल.पी.चे (केअर ऑफ) विठ्ठल खत कारखाना (विसावा स्टॉप, कासेगाव, ता पंढरपूर) यांच्या विरोधात पंढरपूर तालुका पोलिस ठाण्यात गुन्हा दाखल करण्यात आला आहे.

जिल्हास्तरीय भरारी पथकाने ३१ जुलैला रात्री नऊच्या सुमारास कंपनीच्या गोडाऊनवर छापा टाकून तपासणी केली. या पथकात कृषी विकास अधिकारी हावळे यांच्यासह कृषी अधिकारी सावंत, बोंगे, सुमित यलमार सहभागी झाले.

या प्रकारामुळे शेतकऱ्यांची फसवणूक झाली असून, खत नियंत्रण आदेश १९८५ व अत्यावश्यक वस्तू अधिनियम १९५५ मधील विविध तरतुदींचे उल्लंघन झाल्याचे निदर्शनास आले आहे. याप्रकरणी आता साळुंखे व जाधव (महालक्ष्मी फर्टिलायझर्स एल. एल. पी.) यांच्याविरुद्ध पंढरपूर तालुका पोलिस ठाण्यात गुन्हा दाखल करण्यात आला आहे.

तपासादरम्यान आढळलेल्या त्रुटी

खत उत्पादनासाठी आवश्यक असलेल्या कच्च्या मालाच्या खरेदीसाठी कोणतीही अधिकृत परवानगी घेतलेली नव्हती.

उत्पादित खत दुसऱ्या विक्रेत्याच्या बॅगेत भरून विक्री केली जात होती.

उत्पादन, विक्री, वितरण व व्यवस्थापन यासंबंधी कोणतेही अद्ययावत अभिलेख ठेवलेले नव्हते.

स्वतःची उत्पादन यंत्रणा बंद असताना बाहेरून आणलेला माल गोडाऊनमध्ये वाहतूक करून, स्वतःच्या व अन्य विक्रेत्यांच्या बॅगांमध्ये भरून विक्रीसाठी तयार केला जात होता.

बनावट खताच्या ७१९ गोण्या (प्रत्येकी ५० किलो वजनाच्या), तसेच ७०७ रिकाम्या गोण्या आढळून आल्या.