Pune News : पुणे महापालिकेच्या वर्धापनदिनानिमित्त फळे, फुले व भाजीपाला स्पर्धा, प्रदर्शनाचे आयोजन करण्यात आले आहे. हे प्रदर्शन जंगली महाराज रस्त्यावरील छत्रपती संभाजी महाराज उद्यानात शनिवार (ता. १०) आणि रविवार (ता.११) रोजी सकाळी ८ ते रात्री ८ या वेळेत सर्वांसाठी खुले असेल. प्रदर्शनाचे उद्‍घाटन शनिवारी (ता.१०) सकाळी ११ वाजता आयुक्त विक्रम कुमार यांच्या हस्ते होणार आहे.

प्रदर्शनामध्ये १२ विभाग असून, २१६ उपविभाग आहेत. त्यामध्ये विविध प्रकारच्या शोभिवंत फुलांच्या कुंड्यांची मांडणी, औषधी वनस्पतींचा संग्रह, गुलाबांची मांडणी, हंगामी फुले, टेबल सजावट, भाजीपाला, सॅलड सजावट, प्रक्रिया करून तयार केलेले पदार्थ, विविध प्रकारचे हार, पुष्पगुच्छ, शिंपले, वेण्या, गजरे प्रदर्शनात मांडण्यात येणार आहेत.

विविध प्रकारचे डेलिया, आर्किड, जरबेरा, गुलाब आदी हंगामी तसेच बहुवार्षिक फुलझाडे प्रदर्शनातील प्रमुख आकर्षण आहे. प्रदर्शनाच्या निमित्ताने घेण्यात आलेल्या विविध स्पर्धांमधील विजेत्या स्पर्धकांना पारितोषिक दिले जाणार आहे.

स्पर्धेत यांचा सहभाग

स्पर्धेमध्ये सावित्रीबाई फुले पुणे विद्यापीठ, मेट्रो, नदी सुधारणा प्रकल्प, घनकचरा व्यवस्थापन, वन विभाग, पुणे सर्प विज्ञान संस्था, राजीव गांधी प्राणी संग्रहालय, पर्यावरण केंद्र, पुष्करणी, उत्तरा पर्यावरण केंद्र, लोणावळा, टिळक आयुर्वेद महाविद्यालय, फ्रेंड्स ऑफ बोन्साय, पिंपरी-चिंचवड महापालिकेचा समावेश आहे.