Pune News : किल्ले राजगडाकडे जाणाऱ्या मार्गावरील पाली दरवाजा परिसरात एक विद्युतवाहिनी आहे.

सध्या ही विद्युतवाहिनी तुटण्याच्या अवस्थेत असून कोणत्याही क्षणी अपघात होण्याच्या शक्यतेमुळे शेतकऱ्यांकडून चिंता व्यक्त केली जात आहे. या धोकादायक विद्युतवाहिनीची दुरूस्तीची मागणी त्यांनी केली आहे.

शेतकरी पांडुरंग दरडिगे यांनी सांगितले की, पाऊस थांबल्यामुळे राजगडाला भेट देणाऱ्या पर्यटकांच्या संख्येत मोठी वाढ होणार आहे. गडाकडे जाणाऱ्या विद्युतवाहिनीची स्थिती धोकादायक झाली आहे. विजेच्या खांबावरील संरक्षक तार तुटली असून मुख्य विद्युतवाहिनीमधील तारा कोणत्याक्षणी तुटून अपघात घडण्याची शक्यता नाकारता येत नाही.

राज्याच्या पुरातत्त्व व वस्तुसंग्रहालये संचालनालयाच्या अखत्यारित असलेल्या पुणे विभागाच्या सहायक संचालकांना या समस्येची माहिती देण्यात आली आहे.

राजगडाची देखभाल पुरातत्त्व खात्याकडून केली जात असून गडावर संवर्धनाची कामे सुरू आहेत. पुरातत्त्व खात्याने महावितरणशी संपर्क साधून विद्युतवाहिनीची दुरुस्ती करावी. तसेच गडावरील संपूर्ण विद्युतवाहिनीचे परीक्षण करावे, असे श्री.दरडिगे यांनी सांगितले.