Baramati News : कृषी विज्ञान केंद्रात होणारे संशोधन हे मधमाशी पालकांसाठी फायदेशीर होईल, त्या दृष्टीने करावे. कोरोनानंतर मध निर्यातीचे प्रमाण वाढले आहे. त्याचा फायदा देशाची आर्थिक स्थिती मजबूत होण्यासाठी करता होईल. मधमाशीपालन व्यवसाय देशाचा आर्थिक कणा मजबूत करू शकतो, असे मत भारतीय समन्वित संशोधन प्रकल्पाचे प्रकल्प समन्वयक डॉ. सचिन सुरोशे यांनी व्यक्त केले.

मधमाशी व परागीभवन कीटक संशोधन प्रकल्प या विषयावर भारतामधील २५ राज्यांमध्ये प्रकल्प राबवण्यात येतो. यासाठी अखिल भारतीय संशोधन परिषदेमार्फत सहा शास्त्रज्ञांची समिती स्थापन करण्यात आली आहे.

त्या अनुषंगाने २ ते ३ सप्टेंबर २०२४ रोजी भारतामधील पश्चिम विभागातील पाच राज्यांची पंचवार्षिक आढावा बैठक कृषी विज्ञान केंद्रामध्ये आयोजित करण्यात आली होती. त्या वेळी श्री. सुरोशे हे बोलत होते.

या वेळी डॉ. वाय. एस. परमार फलोत्पादन आणि वनीकरण विद्यापीठाचे माजी कुलगुरू डॉ. एच. सी. शर्मा, अखिल भारतीय समन्वीत मधमाशी व परागीभवन कीटक संशोधन प्रकल्पाचे माजी प्रकल्प समन्वयक डॉ. राजकुमार ठाकूर, स्कॉस्टच्या कृषी विद्याशाखाचे माजी अधिष्ठाता डॉ. डी. पी. अॅब्रोल, डॉ. के. लक्ष्मी राव, एम.आर. श्रीनिवासन, ॲग्रीकल्चरल डेव्हलपमेंट ट्रस्टचे मुख्य कार्यकारी अधिकारी नीलेश नलावडे, डॉ. मिलिंद जोशी,

शास्त्रज्ञ डॉ. कुमारनाग, डॉ. धीरज शिंदे, अल्पेश वाघ, प्रशांत गावडे, आशिष भोसले, अक्षय कुंभार, सचिन क्षीरसागर उपस्थित होते. यामध्ये इंदिरा गांधी कृषी विद्यापीठ, रायपूरचे राजमोहिनीदेवी कृषी संशोधन केंद्र, अंबिकापूर, छत्तीसगड, कृषी विद्यापीठ व कृषी संशोधन केंद्र उम्मेदगा कोटा राजस्थान, नवसारी कृषी विद्यापीठ, गुजरात, बांदा कृषी व तंत्रज्ञान विद्यापीठ उत्तर प्रदेश व कृषी विज्ञान केंद्र, बारामती या केंद्रांनी सादरीकरण केले.