Akola News : तेल्हारा तालुक्यातील हिंगणी बुद्रुक, हिंगणी खुर्द, हिंगणी हयातपूर येथील हरभरा दुबार पेरणी केलेले शेतकरी शासकीय अनुदानापासून वंचित असल्याची तक्रार शेतकऱ्यांनी जिल्हाधिकाऱ्यांकडे केली आहे. याबाबत शेतकऱ्यांनी म्हटले आहे, की हिंगणी बुद्रुक, हिंगणी खुर्द, हिंगणी ह्यातपूर येथील शेतकऱ्यांना सन २०२३-२४ च्या रब्बी हंगामात पावसामुळे हरभऱ्याची दोन वेळा पेरणी करावी लागली.

शासनाने दुबार पेरणी केलेल्या शेतक‌ऱ्यांना अनुदान जाहीर केले. परंतु गावातील तलाठी व अधिकाऱ्यांनी कोणत्याही प्रकारची पाहणी न करता अनुदान वाटप केले. जे शेतकरी अनुदानास पात्र होते त्या कोणालाही अनुदान देण्यात आलेले नाही.

परंतु जे शेतकरी अनुदानास पात्र नव्हते आणि त्यांच्या शेतात हरभऱ्याशिवाय इतर पीक लावलेले असताना सुद्धा त्यांना हरभरा दुबार पेरणीचे अनुदान मिळाले. अशा प्रकारे ६५० शेतकऱ्यांना अनुदान वाटप केले.

याबाबत विचारणा केली असता वारंवार उडवाउडवीची उत्तरे देण्यात आली. या सर्व प्रकारामध्ये लालसेपोटी अनुदान यादी बनवण्यात आली. यापूर्वी सुद्धा अनुदान यादीमध्ये अनेकदा अफरातफर झाली आहे.

पात्र शेतकत्यांना अनुदानापासून वंचित ठेवण्यात आलेले आहे, असेही निवेदनात म्हटले. याबाबत रघुनाथ कोरडे, विष्णू निवृत्ती खडसे, रमेश महादेव कोरडे, सचिन कोरडे, दीपक कोरडे, नवनाथ भिसे, सुरेश कोरडे, भास्कर खानझोडे, अरूण गावंडे, दीपक वाघ, सुधाकर कोरडे, महादेव कोरडे आदींनी हे निवेदन दिले.