Mumbai News : केंद्र सरकारच्या पीएम किसान योजनेच्या सोळाव्या हप्त्याचा लाभ ८७ लाख ९६ हजार शेतकऱ्यांना मिळणार असून या पोटी १९४३ कोटी ४६ लाख रुपये शेतकऱ्यांच्या खात्यामध्ये जमा होणार आहेत. राज्य सरकारच्या नमो शेतकरी महासन्मान निधीचे चार हजार रुपयांप्रमाणे ३७९२ कोटी रुपये शेतकऱ्यांच्या खात्यांमध्ये जमा होणार आहेत.

२८ फेब्रुवारी रोजी यवतमाळ जिल्ह्यातील भारी येथे पंतप्रधान नरेंद्र मोदी (Narendra Modi) यांच्या हस्ते एका विशेष समारंभात या हप्त्याचे वितरण होणार आहे. लोकसभा निवडणुकीच्या पार्श्‍वभूमीवर गाजावाजा करत तीन हप्ते एकत्र देण्यात येणार असून याची तयारी थेट पंतप्रधान कार्यालयातून करण्यात आली आहे. केंद्रीय कृषी विभाग आणि राज्य सरकारने या कार्यक्रमाचे आयोजन केले आहे.

केंद्र सरकारच्या पीएम किसान योजनेच्या सोळाव्या हप्त्याचा लाभ राज्यातील ८७ लाख ९६ हजार शेतकऱ्यांना डीबीटीद्वारे देण्यात येणार आहे. पंधराव्या हप्त्याच्या तुलनेत २ लाख ३३ हजार शेतकऱ्यांची भर पडली असून या शेतकऱ्यांनी ई-केवायसी (e-KYC) पूर्ण केली आहे. मागील अर्थसंकल्पी अधिवेशनात देवेंद्र फडणवीस (Devendra Fadnavis) यांनी नमो शेतकरी महासन्मान निधीची घोषणा केली होती.

त्यानुसार पहिला हप्ता या आधीच वितरित करण्यात आला आहे. केंद्र सरकारच्या पीएम किसान योजनेच्या चौदाव्या हप्त्यामध्ये ८५ लाख ६० हजार शेतकऱ्यांना नमो शेतकरी महासंघ निधीचा लाभ देण्यात आला होता. यापोटी १७१२ कोटी रुपये वितरित करण्यात आले होते. आता दुसऱ्या हप्त्यासाठी १७९२ कोटी आणि तिसऱ्या हप्त्यासाठी दोन हजार कोटींच्या वितरणास राज्य सरकारने मान्यता दिली आहे. त्यामुळे हे तिन्ही हप्ते शेतकऱ्यांच्या खात्यांवर जमा होणार आहेत.

गावोगावी साजरा होणार किसान दिवस

२८ फेब्रुवारी हा दिवस संपूर्ण देशभर पीएम किसान उत्सव दिवस म्हणून साजरा करण्याचे निर्देश केंद्र सरकारने दिले आहेत. त्यानुसार कृषी आयुक्त डॉ. प्रवीण गेडाम (Praveen Gedam) यांनी कृषी विभागाच्या जिल्हा, तालुका स्तरावरील अधिकाऱ्यांना हा दिवस पीएम किसान उत्सव दिवस म्हणून साजरा करण्याचे निर्देश दिले आहेत. त्यानुसार क्षेत्रीय अधिकाऱ्यांना सूचना दिल्या असून गाव पातळीवर तसेच कृषी विज्ञान केंद्र सामाईक सुविधा केंद्र येथेही पीएम किसान उत्सव दिवस साजरा केला जाणार आहे.