Crop Laon Satara News : सातारा जिल्ह्यात खरीप व रब्बी पीक कर्ज वितरण १०२ टक्के झाले असून, यामध्ये सातारा जिल्हा मध्यवर्ती सर्वाधिक ११७ टक्के कर्ज वितरण आघाडी कायम ठेवली आहे. तसेच राष्ट्रीयकृत व खासगी बँकांनी ७९ टक्के कर्ज वितरण केले आहे. तसेच २०२३-२४ या वर्षासाठी तीन हजार कोटी रुपयांचे उद्दिष्टे ठेवण्यात आली आहेत.

खरीप हंगामासाठी एप्रिल ते सप्टेंबर, तर रब्बी हंगामातासाठी ऑक्टोबर ते मार्च अखेर कर्जवाटप केले जाते. खरीप व रब्बी हंगामासाठी बँकांना २८०० कोटीचे उद्दिष्ट देण्यात आले होते. बँकांनी ३,७५,३७२ शेतकऱ्यांना २८६६ कोटी ४५ लाख रुपयांचे वितरण करण्यात आले आहे. सर्व बँकांनी मिळून १०२ टक्के पीक कर्जाचे वितरण केले आहे. यामध्ये सर्वाधिक जिल्हा बँकेचा वाटा आहे.

जिल्हा बँकेस १७११ कोटीचे उद्दिष्टे देण्यात आली होती. या बँकेने ३,२८,८१९ शेतकऱ्यांना २००२ कोटी ९८ लाख रुपयांचे कर्ज वितरण केले आहे. जिल्हा बँकेने उद्दिष्टापेक्षा जास्त म्हणजे ११७ टक्के वाटप केले आहे.

तसेच राष्ट्रीयकृत व खासगी बँकांना १०८९ कोटी रुपयांचे उद्दिष्टे देण्यात आले होते. यापैकी या बँकांनी ४६,५५३ शेतकऱ्यांना ८६३ कोटी रुपयांचे वाटप केले आहे. यातील अनेक बँकांनी कर्ज वितरणाकडे लक्ष दिले नसल्यामुळे ७९ टक्के उद्दिष्टे गाठता आले आहे.

राष्ट्रीयकृत व खासगी बँकाचे सातत्याने शेतकऱ्यांना कर्ज वितरणाकडे दुर्लक्ष केले जात आहे. सिबिल खराब असलेल्या शेतकऱ्यांना कर्ज वितरण करण्याचे आदेश दिले असले तरी बँका या आदेशाकडे दुर्लक्ष केले जाते. या बँकावर कारवाई होत नसल्यामुळे कर्ज वितरण करणाऱ्यांकडे लक्ष दिले जात नाही.

आगामी खरीप व रब्बी हंगामासाठी ३००० कोटी रुपयांचे उद्दिष्टे ठेवण्यात आले आहे. यामध्ये सातारा जिल्हा मध्यवर्ती बँकेस १८३५ कोटी उद्दिष्टे दिली असून यामध्ये खरिपात १२८५ कोटी, तर ५५० कोटी उद्दिष्टे देण्यात आले आहे. तर इतर बँकांना ११६५ कोटी दिसून यापैकी खरिपासाठी ८१५ कोटी तर रब्बी३५०कोटी उद्दिष्ट देण्यात आले आहे. सध्या खरीप हंगामातील कर्ज वितरण सुरू झाले आहे.