Kolhapur News : म्हासुर्ली (ता. राधानगरी) येथील मातीच्या बंधाऱ्यात अडविलेले पाणी संपल्याने धामणी नदीचे पात्र कोरडे पडले आहे. त्यामुळे धामणी खोऱ्यातील सुमारे २५ गावांत तीव्र पाणीटंचाई जाणवू लागली असून, तीव्र पाणीटंचाईमुळे पिण्याच्या पाण्यासह शेतीच्या पाण्याचा प्रश्न गंभीर बनला आहे.

गगनबावडा, राधानगरी व पन्हाळा या तीन तालुक्यांतील सुमारे ४० गावांना धामणी नदीतून पाणीपुरवठा होतो. उन्हाळ्यात पिकांना जीवदान मिळावे यासाठी हिवाळ्यातच लोकवर्गणी व श्रमदानातून शेतकरी मातीचे बंधारे बांधून धामणी नदीत पाणी अडवितात.

गेल्या महिनाभरापासून कडक उन्हाळ्याच्या झळा जाणवत आहेत. दरवर्षीपेक्षा या वेळी परिसरात ऊसतोडणी हंगाम लवकरच संपला. त्यामुळे ऊस शेतीसाठी पाणीउपसा मोठ्या प्रमाणावर सुरू झाला. पश्चिमेकडील नदी उगमाकडील परिसरात थोडेफार पाणी आहे.

कडवेपासून म्हासुर्ली दरम्यानच्या परिसरात धामणी नदीपात्रात खडखडाट झाला आहे. कृषिपंप उघड्यावर पडले आहेत. त्यामुळे सुमारे २५ गावांतील पिण्याच्या आणि शेतीच्या पाण्याचा प्रश्न गंभीर बनला आहे.