Amaravati News : जून महिन्याच्या मध्यंतरात पावसाळा सुरू झालेला असतानासुद्धा जिल्ह्यातील पाणीटंचाईचे ग्रहण सुटता सुटेना, अशी परिस्थिती आहे. आजही ११ गावांना २० टॅंकर्सच्या माध्यमातून पाणीपुरवठा केला जात आहे.

विशेष म्हणजे, जिल्ह्यातील १४ तालुक्यांमधील ११० गावांमध्ये ८५ खासगी विहिरींचे अधिग्रहण करून तेथील नागरिकांची तहान भागविण्यात येत आहे. त्यामुळे आता सर्वांनाच समाधानकारक पावसाची प्रतीक्षा लागली आहे.

यंदा जूनमध्ये सुद्धा समाधानकारक पाऊस झालेला नाही. काही ठिकाणी पाऊस पडतो तर काही भाग कोरडाच आहे. त्यातच उष्णतेची तीव्रताही वाढली आहे. जून महिन्याचे २२ दिवस उलटूनसुद्धा मुसळधार पाऊस न झाल्याने टंचाईची परिस्थिती कायम आहे.

मे मध्ये सुरू झालेले टॅंकर्स आजही सुरूच असून विहिरींच्या अधिग्रहणाची संख्यासुद्धा वाढलेली दिसून येत आहे. विशेष म्हणजे यंदा एप्रिल महिन्यातच टंचाईग्रस्त गावांना टॅंकर सुरू करण्यात आले आहेत.