Pune News : शेतकऱ्यांनी रब्बी हंगामाची तयारी सुरू केली आहे. शेतकऱ्यांची गरज लक्षात घेऊन जिल्हास्तरावरून करण्यात आलेल्या मागणीनुसार विभागीय कृषी सहसंचालक कार्यालयामार्फत कृषी आयुक्त कार्यालयाकडे एक लाख ८१ हजार टन खतांची मागणी केली आहे. कृषी आयुक्तलयाकडून मंजुरी मिळाल्यानंतर मागणी केलेल्या खतांचे वितरण करण्यात येणार असल्याची माहिती कृषी विभागाच्या सूत्रांनी दिली.

चालू वर्षी जून ते सप्टेंबर या महिन्यांत पुरेसा पाऊस न पडल्याने खरीप हंगाम वाया गेला आहे. त्यामुळे रब्बी हंगामात पेरणीच्या क्षेत्रात काही प्रमाणात वाढ होणार असल्याचा अंदाज कृषी विभागाचा आहे.

कृषी विभागाने लवकर तयारी करून बियाणे, खते पुरवठा करण्याचे नियोजन सुरू केले आहे. जिल्ह्यात रब्बीचे क्षेत्र सरासरी दोन लाख ४९ हजार हेक्टर आहे. यामध्ये सर्वाधिक क्षेत्र रब्बी ज्वारीचे आहे. त्यासाठी मोठ्या प्रमाणात खतांची मागणी केली आहे.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

गेल्या वर्षी एक लाख ८५ हजार ९४० टन खतांची मागणी केली होती. त्याअनुषंघाने कृषी विभागाने नियोजन केले आहे. रब्बी हंगामात नत्र खतामध्ये युरियाला सर्वाधिक मागणी असण्याची गरज लक्षात घेऊन जिल्ह्यासाठी ८५ हजार २५६ टन खतांची मागणी केली आहे.

त्यामुळे रब्बी हंगामात नत्रांची अडचण भासणार नाही. तसेच एनपीके ही पाण्यातून देण्यात येणारी विद्राव्य खताचीही मागणी केली आहे. परंतु शेतकऱ्यांना कृषी आयुक्तांनी घेतलेल्या निर्णयानुसार पीओएस मशिनवर नोंदणी केल्याशिवाय खते मिळणार नसल्याची माहिती कृषी विभागाच्या सूत्रांनी दिली.

महिनानिहाय मागणी केलेली खते, टनांमध्ये :

महिना --- मागणी केलेली खते

आँक्टोबर -- १८,१००

नोव्हेंबर -- २७,१४०

डिसेंबर --- २७,१५०

जानेवारी -- ३६,२००

फेब्रुवारी ---३६,२००

मार्च --- ३६,२००