Nashik News : कसमादे भागात सटाणा तालुक्यातील नुकसानग्रस्त भागाची पाहणी कृषिमंत्री माणिकराव कोकाटे यांनी केली. मात्र, मागील दोन वर्षांपूर्वी गारपीट झाल्यानंतर तत्कालीन मुख्यमंत्री एकनाथ शिंदे यांनी नुकसान भरपाईची पाहणी केली होती; मात्र नुकसान भरपाई एक वर्षानंतर मिळाली.

त्यामुळे शेतकऱ्यांना नुकसान भरपाई वेळेवर मिळणार का? असा सवाल नुकसानग्रस्त शेतकऱ्यांनी कृषीमंत्री माणिकराव कोकाटे यांच्या समोर उपस्थित केला. मात्र पंचनामे झाल्यानंतर वेळेवर नुकसान भरपाई देण्यात येईल, असे आश्वासन अॅड. माणिकराव कोकाटे यांनी शेतकऱ्यांना दिले.

गेल्या सप्ताहात झालेल्या अवकाळी पाऊस व गारपिटीमुळे कांद्यासह, डाळिंब, द्राक्षबागा व भाजीपाला पिकांचे मोठे नुकसान आहे. या पार्श्वभूमीवर कृषिमंत्री माणिकराव कोकाटे यांनी रविवार (ता. ६) रोजी तालुक्यातील करंजाड खोऱ्यातील बिजोटे तर मोसम खोऱ्यातील जायखेडा येथे येथील नुकसानग्रस्त शेतकऱ्यांच्या बांधावर भेट देत पाहणी केली. यावेळी बागलाणचे आमदार दिलीप बोरसे हे त्यांच्यासमवेत होते. गारपीटग्रस्त भागातील नुकसानीचे तातडीने पंचनामे करण्याच्या सूचना यावेळी कोकाटे यांनी क्षेत्रीय यंत्रणेला दिल्या.

आश्वासन दिल्याप्रमाणे मदत मिळणार का ?

बिजोटे,जायखेडा या भागात गेल्या दोन वर्षापूर्वी एप्रिल महिन्यात गारपीट झाली होती. तत्कालीन मुख्यमंत्री एकनाथ शिंदे यांनी या भागात पाहणी दौरा करत तातडीने मदत देण्याचे आश्वासन दिले होते. मात्र, प्रत्यक्षात शेतकऱ्याचा हाती एक वर्ष उलटूनही मदत मिळाली नसल्याचे शेतकऱ्यांनी सांगितले.

कृषिमंत्र्यांनी या पाहणी दौऱ्यानंतर आठ ते दहा दिवसात मदत मिळवून देण्याचे आश्वासन दिले. याकडे आता शेतकऱ्यांचे लक्ष लागून आहे. यावेळी नुकसान भरपाई वेळेवर न मिळणे, याशिवाय कांदाचाळ, पॅकिंग शेड, फळबाग लागवडी, ठिबक व यांत्रिकीकरण यासाठी शेतकऱ्यांचे अनुदान थकीत असल्याचा मुद्दा शेतकऱ्यांनी उपस्थित केला.