Kolhapur News : पावसाने दैना उडवल्याने याचा फटका पिकांच्या उत्पादनावर झाला आहे. पीक परिस्थिती चांगली असताना अखेरच्या टप्प्यातील पावसाने शेतकऱ्यांच्या तोंडावरचे हसू पळवले आहे.

भात, भुईमुगाच्या उत्पादनात घट झाल्याचे शेतकरी सांगत आहेत. भुईमुगाचे पन्नास तर भाताचे उत्पादन वीस टक्के घटणार आहे. पावसाने चार दिवस उघडीप दिली आहे. त्यामुळे ठप्प झालेली सुगीची कामे वेगाने सुरू झाली आहेत. दिवाळीला सुरुवात झाली असून, सुगी घरी आणण्यासाठी शेतकरी धडपडत आहे.

भाताला फूल धरण्याच्या अवस्थेतमध्ये पडलेल्या पावसाने चिंबाचे प्रमाण वाढले आहे. त्यात पावसाच्या माऱ्याने भात पडून कुजले असून, तर काही ठिकाणी उगवणं झाली आहे. शेतवडीतून पाणी वाहत असल्याने भात कापणी करताना शेतकऱ्यांना त्रास सहन करावा लागत आहे.

पावसाचे सातत्य राहिल्याने जमिनीला वापसा आला नाही. याचा भुईमुगाच्या पिकावर परिणाम झाला. आऱ्या धरण्याच्या अवस्थेत मुळे कुजल्याने उत्पादनात घट झाली आहे.

भुईमुगाच्या झाळीला चार, पाच शेंगा मिळत असल्याचे शेतकरी सांगतात. पावसामुळे शेतवडीत दलदल आहे. त्यामुळे कापलेले भात अन्यत्र नेऊन मळणी काढण्यासाठी वाहतूक व मजुरांच्या खर्चात वाढ होणार आहे.