Water Satara News : सातारा जिल्ह्यातील प्रमुख धरणांत जेमतेम पाणीसाठा शिल्लक राहिला आहे. कोयनेतून वीजनिर्मिती, शेतीसाठी व कर्नाटक राज्याला पाणी दिल्याने शिवसागर जलाशयाची पाणीपातळी घटली आहे. कोयना धरणात केवळ २३.३९ टक्के पाणीसाठा शिल्लक आहे.

इतर धरणांतही निम्म्यापेक्षा कमी पाणी शिल्लक आहे. मॉन्सून लांबल्यास आगामी काळात पाणीटंचाईचा सामना नागरिकांना करावा लागेल.

जिल्ह्यातील प्रमुख धरणांतील पाणीसाठा झपाट्याने कमी होत आहे. सध्या उष्णतेचे प्रमाण प्रचंड वाढले आहे. ३९ ते ४२ अंश सेल्सिअसपर्यंत पारा वर गेला आहे. त्यामुळे दुपारच्या वेळी नागरिक घरातून बाहेर पडणे टाळत आहेत.

जिल्ह्यातील कोयनेसह प्रमुख धरणांतील पाणीपातळी २५ ते ४० टक्क्यांपर्यंत खाली आली आहे. कोयनेत २३.३९, धोममध्ये ४१.४७, बलकवडीत २१.१०, कण्हेर २७.८८, उरमोडीत ४२.४५, तारळीत ५५.८०, तर येरळवाडीत १९.३३ टक्के पाणीसाठा आहे.

शिवसागर जलाशयातील पाणीपातळी नीचांकी पातळीवर पोहोचली आहे. बामणोली, वानवली, तापोळा, सोळशी भागांतील नदीपात्र कोरडे पडले आहेत. कोयना नदीपत्राला ओढ्याचे स्वरूप आल्याने दैनंदिन रोजंदारीचा बोटिंग व्यवसायही अडचणीत आला आहे. सध्या तापोळा ते बामनुरी, भांबोली, बामणोली भागांत अल्प पाणीसाठा आहे. लॉन्च, स्पीड बोट, पेंडल बोट जिथे पाणी आहे तेथेच उपलब्ध आहेत.

दुर्गम भागात नागरिकांची पायपीट

दुर्गम भागातील लोकांचे हाल होत आहेत. पाणी नसल्यामुळे एका गावातून दुसऱ्या गावात जाण्यासाठी कित्येक किलोमीटरची पायपीट करावी लागत आहे. दुष्काळी भागात पाणीटंचाई भासू नये, यासाठी कण्हेर, उरमोडी, तारळी धरणांतून पाणी सोडण्याचे नियोजन करावे लागेल. सध्या दुर्गम भागात पाणीटंचाई जाणवू लागली आहे. लोकांना पायपीट करून पिण्यासाठी पाणी आणावे लागत आहे.

धरणनिहाय शिल्लक पाणीसाठा (टीएमसी)

कोयना - २४.६२

धोम- ५.६०

धोम बलकवडी - ०.८६

कण्हेर - २.८२

उरमोडी - ४.२३

तारळी - ३.२५

येरळवाडी - ०.६००