Amaravati News : सिंचनकामी दिवसा वीज मिळावी, याकरिता मुख्यमंत्री सौर कृषी वाहिनी योजना राबविण्यात आली. मात्र याकरिता आवश्‍यक जागेचा तिढा कायम असल्याने या योजनेला जिल्ह्यात गती मिळू शकली नाही. परिणामी, दिवसा वीज हे शेतकऱ्यांसाठी दिवास्वप्नच ठरले आहे.

पारंपरिक ऊर्जा उपलब्धतेच्या मर्यादा आहेत. त्या पार्श्‍वभूमीवर शेतीला सिंचनकामी दिवसा वीज मिळावी, याकरिता अपारंपरिक ऊर्जेच्या उपलब्धतेचा निर्णय घेण्यात आला. मुख्यमंत्री सौर कृषी वाहिनीच्या माध्यमातून शेतीला दिवसा वीजपुरवठा करण्यात येणार आहे.

त्याकरिता जिल्ह्यात जवळपास ८८ उपकेंद्रे उभारण्यात येणार होती. परंतु महावितरणच्या सूत्रांनी दिलेल्या माहितीनुसार, सध्या केवळ ३९ उपकेंद्रांकरिताच जागा उपलब्ध झाली आहे. २७ उपकेंद्रांसाठी जागाच उपलब्ध झाली नाही, तर २२ उपकेंद्रासाठीची जागा प्रकल्पाला पूरक नाही. त्यामुळे ही योजना गेल्या काही वर्षांत पुढेच सरकली नाही, अशी स्थिती आहे.

विशेष म्हणजे पडीक असलेल्या जमिनीवर सौरऊर्जा निर्मिती प्रकल्प उभारण्यात येतील. जिल्ह्यात जवळपास ३५६ मेगावॉट वीज निर्मिती करण्याचा उद्देश असून, यासाठी ८८ उपकेंद्र उभारण्यात येणार आहेत. सध्या शेतीला रात्री वीजपुरवठा केला जात असल्याने अनेक अडचणींचा सामना करावा लागत आहे.

एक मेगावॉटसाठी हवी चार एकर जमीन

सौरऊर्जा प्रकल्पातून शेतीला दिवसा वीजपुरवठा करण्याचे नियोजन आहे. त्यानुसार एक मेगावॉट वीज निर्मितीकरिता सुमारे तीन ते चार एकर जमिनीची गरज राहते. जिल्ह्यात जवळपास ३६५ मेगावॉट ऊर्जा निर्मिती केली जाणार असून, यासाठी १७०० ते १८०० एकर जमीन ‘महावितरण’ला लागणार आहे.