Pune News : कमी दाब क्षेत्राची तीव्रता वाढत असल्याने बंगालच्या उपसागरामध्ये शनिवारपर्यंत (ता. २५) चक्रीवादळाची निर्मिती होण्याचे संकेत हवामान विभागाने दिले आहेत. तर आग्नेय अरबी समुद्रात केरळच्या किनाऱ्यालगत कमी दाब क्षेत्र तयार झाले आहे. या प्रणालींमुळे दोन्ही समुद्रात ढगांची दाटी झाली आहे.

नैॡत्य बंगालच्या उपसागरात उत्तर तमिळनाडू आणि दक्षिण आंध्र प्रदेशच्या किनाऱ्यालगत बुधवारी (ता. २२) कमी दाब क्षेत्राची निर्मिती झाली. गुरुवारी (ता. २३) हे कमी दाबाचे क्षेत्र ठळक झाले असून, त्याची तीव्रता वाढत आहे. शनिवारपर्यंत (ता. २५) बंगालच्या उपसागरात चक्रीवादळाची निर्मिती होण्याचे संकेत आहेत.

उत्तरेकडे सरकणारी ही प्रणाली रविवारपर्यंत (ता. २५) बांगलादेश, पश्‍चिम बंगालच्या किनाऱ्यावर पोहोचणार आहे. किनाऱ्यावर पोहोचताच हे चक्रीवादळ तीव्र होण्याचा इशारा हवामान विभागाने दिला आहे.

यातच अरबी समुद्रात असलेल्या चक्राकार वाऱ्यांच्या प्रभावामुळे केरळच्या किनाऱ्यालगतच्या आग्नेय अरबी समुद्रात कमी दाब क्षेत्राची निर्मिती झाली आहे. त्याला लागूनच समुद्र सपाटीपासून ७.६ किलोमीटर उंचीवर चक्राकार वारे वाहत आहेत. या दोन्ही प्रणालींमुळे मॉन्सूनच्या आगमनावर परिणाम होणार आहे.

मॉन्सूनची प्रगती शक्य

नैॡत्य मोसमी वाऱ्यांनी (मॉन्सून) बुधवारी (ता. २२) अंदमान -निकोबार बेट समूहाचा बहुतांशी भागात प्रगती केली आहे. तर अरबी समुद्रातून पुढे चाल करत श्रीलंकेचा जवळपास निम्मा भूभाग व्यापला आहे. प्रगतीस पोषक हवामान असल्याने दोन दिवसांत उर्वरित अंदमान बेटांसह पूर्व-मध्य बंगालच्या उपसागरात मॉन्सूनच्या दाखल होण्याची शक्यता आहे.