Palghar Agriculture News : जून महिन्याच्या मध्यावधीपासून पावसाचे संकेत देण्यात आले आहेत. सध्या मान्सूनपूर्व कामे अंतिम टप्प्यामध्ये आली आहेत. तालुक्यातील शेतकरी भात पेरणीसाठी बी-बियाणे खरेदीच्या कामाला लागला आहे.

विक्रमगड, डहाणू तालुक्यातील बळीराजा खरीप हंगामासाठी सज्ज झाला आहे. सध्या कृषी सेवा केंद्रावर खते, बी-बियाणे खरेदी करण्यासाठी गर्दी होत आहे.

विक्रमगड तालुक्यातील साधारणपणे ७,५५८ हेक्टर क्षेत्रावर भातशेती करण्यात येते. जून मध्यात पाऊस पडण्याची शक्यता हवामान खात्याने वर्तवली असल्याने बळीराजाच्या आशा पल्लवित झाल्या आहेत.

यामुळे बळीराजा शेतीच्या मशागतीची कामे पूर्ण करत आहे. आता शेतकरी खरीप हंगामासाठी खरेदीच्या तयारीला लागला आहे. या हंगामात विक्रमगड, डहाणू तालुक्यात भात, नागली आणि भाजीपाला अशी पिके घेतली जातात.

भाजीपाला पिके कमी कालावधीत शेतकऱ्यांना पैसे मिळवून देणारी पिके आहेत. भात पीक हे शेतकऱ्यांचे वर्षभराचे उदरनिर्वाहाचे साधन आहे.

पहिला पाऊस पडला की शेतकरी भात पीक पेरणी करतात, तर भाजीपाल्यामध्ये मेथी, कोंथिबीर, दोडके, घोसाळे, मिरची, काकडी अशी भाजीपाला पिके घेतात.