Yavatmal News : दरवाढीच्या अपेक्षेने आजवर साठवून ठेवलेले कापूस, सोयाबीन शेतकऱ्यांनी विक्रीसाठी बाजारात आणले आहे. दिवाळीनंतर कापूस तसेच सोयाबीनच्या दरात वाढ झाली आहे. कापसाचे दर हमीभावापेक्षा जास्त गेले आहेत. दुसरीकडे सोयाबीनच्या दरातही तेजी आल्याने सोयाबीनची आवक वाढली आहे.

यंदा हंगामाच्या सुरवातीपासूनच सोयाबीन आणि कापूस दरात सातत्याने चढ़-उतार राहिले आहेत. सद्यःस्थितीत कापसाला सर्वच बाजारात ७ हजार १५५ रुपयांवर भाव मिळत आहे. जिल्ह्यातील कापसाची पंढरी म्हणून ओळख असलेल्या यवतमाळच्या बाजारात ७ हजार ३०५ रुपयांपर्यंत प्रतिक्विंटल प्रमाणे कापसाला दर मिळत आहे. सध्या रब्बी हंगामात पैशांची आवश्यकता भासत असल्याने ग्रामीण भागातील शेतकरी पांढरे सोने आणि सोयाबीन विक्री करीत आहेत.

जिल्ह्यातील अनेक बाजार समितीत सोयाबीनची आवक वाढली आहे. आता हळूहळू कापसाची आवकही वाढू लागली आहे. दोन्ही पिकांना चांगले दर मिळाल्याने शेतकऱ्यांच्या चेहऱ्यावर समाधान दिसत आहे. दिवाळीपूर्वी सोयाबीनचे दर खाली आले होते. त्यामुळे शेतकऱ्यांनी सोयाबीनची विक्री थांबविली होती. आता सोयाबीनच्या दरात सुधारणा झाल्याने शेतकऱ्यांनी सोयाबीन विक्रीला काढले आहे. सध्या सोयाबीनचे दर पाच हजार दहा रुपये ते पाच हजार ३०५ रुपयांवर गेले आहेत.

लांब स्टेपलच्या कापसाला ७ हजारांवर दर

सोयाबीननंतर कापसाच्या दरातही सुधारणा होत आहे. लांब स्टेपलच्या कापसाला ७ हजार २० तर मध्यम स्टेपलच्या कापसाला ६ हजार ६२० रुपये हमीभाव आहे. त्या तुलनेत कापसाला चांगला दर मिळत आहे. सध्या बोरी अरब बाजार समितीत सात हजार १५५ रुपये दर मिळत आहे. कापूस खरेदीच्या सुरवातीलाच चांगले दर मिळाल्याने शेतकऱ्यांच्या आशा पल्लवित झाल्या आहेत.