Jalgaon News : देशात कापूस दरांवर दबाव वाढला आहे. ही स्थिती लक्षात घेता शासनाने खरेदीसंबंधी हस्तक्षेप करून शेतकऱ्यांना आधार दिला असून, हरियाना, राजस्थान, पंजाब, मध्य प्रदेशात भारतीय कापूस महामंडळाने (सीसीआय) खरेदी सुरू केली आहे. ७०२० रुपये प्रतिक्विंटल दर किंवा हमीभाव कापसाला तेथे दिला जात आहे.

तेलंगणात पुढील आठवड्यात खरेदी सुरू होणार आहे. सध्या देशात सुमारे ५३ खरेदी केंद्र सीसीआयचे सुरू आहेत. तेलंगणात १२० खरेदी केंद्रे सुरू होणार आहेत. महाराष्ट्रातही किती केंद्रे सुरू करायची, याचे नियोजन झाले आहे. परंतु महाराष्ट्रातील खरेदी दिवाळीनंतर सुरू होईल, असेही संकेत सीसीआयच्या सूत्रांनी दिले आहेत.

कापसाचे दर राज्यात हमीभावापेक्षा अधिक अल्प शेतकऱ्यांना किंवा कापूस उत्पादकांना सध्या मिळत आहेत. कमाल दर खानदेश, पश्‍चिम विदर्भात हमीभावापेक्षा कमीच आहेत. उत्तर भारतातही दरांवर दबाव वाढला आहे. देशातील कापूस प्रक्रिया उद्योग रखडत सुरू आहे. जिनिंग प्रेसिंग कारखानदार कापूस दरांमधील चढ-उताराने वित्तीय संकटांचा सामना करीत आहेत. यामुळे कापूस उत्पादक शेतकऱ्यांना आधार देण्याची आवश्यकता लक्षात घेता सरकारने बाजारात हस्तक्षेप केला असून, खरेदी सुरू केली आहे.

उत्तर भारतात (मध्य प्रदेशसह) सुमारे १० लाख कापूस गाठींच्या (एक गाठ १७० किलो रुई) खरेदीचे नियोजन तूर्त सरकारने केले आहे. तसेच तेलंगणात सुमारे पाच लाख गाठींची खरेदी केली जाईल. या तुलनेत महाराष्ट्रातील खरेदी अधिकची असणार आहे, अशी माहिती मिळाली.

राज्यात यंदा सुमारे ४२ लाख हेक्‍टरवर कापसाची लागवड करण्यात आली आहे. त्या माध्यमातून सुमारे ४०० लाख क्‍विंटल कापसाच्या उत्पादकतेचा अंदाज आहे. महाराष्ट्रात अकोला व छत्रपती संभाजीनगर या विभागांतर्गत कापूस खरेदीसंबंधी सुमारे १६२ खरेदी केंद्र सीसीआय सुरू करण्याच्या तयारीत आहे. यात सर्वाधिक खरेदी केंद्र विदर्भात असतील. खरेदी केंद्र निश्‍चित आहेत. त्यात खरेदीसंबंधीची तयारीदेखील झाली आहे. कर्मचाऱ्यांची नियुक्तीदेखील सीसीआयने केली आहे, असे सांगण्यात आले.