Buldana News : तालुक्यात कपाशी पिकाकडे शेतकऱ्यांनी यंदा पाठ फिरवली असून परिणामी कृषी केंद्र चालकांवर कपाशीचे बियाणे शिल्लक दिसून येत आहे. यावर्षी ५० टक्क्यांवर पाकिटे परत करण्याची वेळ आली आहे. आजवरची ही सर्वांत मोठी बियाणे परतफेड मानली जात आहे.

तालुक्याची ‘कॉटन बेल्ट’ही ओळखही बदलत चालली आहे. शेतकरी यंदा मका, तूर, सोयाबीनकडे वळाले आहेत. शेतकऱ्यांच्या मते, कपाशीचे उत्पादन दिवसेंदिवस कमी होत असून खर्च मात्र वाढत आहे.

वेळेवर पीक कर्ज न मिळणे, बाजारात दराचे अस्थिर चित्र, दीर्घकालीन पीक असल्याने रब्बी हंगामावर परिणाम आणि बोंड अळीचा वाढता प्रादुर्भाव यांसारख्या अडचणींमुळे कपाशी पिकाकडे पाठ फिरवण्याचा निर्णय शेतकऱ्यांनी घेतला आहे.

तालुक्यातील अनेक कृषी केंद्र चालकांनी कंपन्यांकडून मोठ्या प्रमाणात बीटी कपाशीचे बियाणे मागवले होते. मात्र मागणीअभावी बियाणे पडून आहे. ते परत पाठवावे लागणार आहे. यावर्षी बीटी कपाशीच्या एका पाकिटाची किंमत सुमारे ८५० रुपये आहे.

बदलते पीक निवडीचे चित्र

या खरीप हंगामात शेतकरी मका, तूर व सोयाबीन यांसारख्या पिकांकडे वळाले आहेत. कमी कालावधीतील पीक, मजूर उपलब्धतेची मर्यादा आणि तुलनेने कमी खर्च या कारणांमुळे हे पर्यायी पीक अधिक लोकप्रिय ठरले आहे. याशिवाय तालुक्यात ४०० ते ५०० एकर शेतीवर सोलर प्रकल्प उभे राहिल्यामुळे कपाशी क्षेत्र आणखी घटले आहे.

तालुक्यात कपाशीच्या पेऱ्यात तब्बल ७० ते ७५ टक्के घट झाली असून बियाण्याची मोठ्या प्रमाणात परतफेड करावी लागत आहे, असे कृषी व्यावसायिक चेतन खर्चे यांनी सांगितले. मागील वर्षीच्या तोट्यामुळे यावर्षी शेतकऱ्यांनी कपाशी न निवडता इतर पर्याय स्वीकारले आहेत, असे कौतुकराव जुनारे म्हणाले.