New Cooperative Body NCOL : सहकार मंत्री अमित शहा यांनी बुधवारी नुकत्याच लॉन्च केलेल्या नॅशनल कोऑपरेटिव्ह ऑरगॅनिक्स लिमिटेड (NCOL) च्या 'भारत ऑरगॅनिक्स' ब्रँडचे उद्घाटन केले. ते म्हणाले की हा भारत आणि परदेशातील सर्वात ‘विश्वासू ब्रँड म्हणून उदयास येईल. शाह यांनी NCOL चा लोगो, वेबसाईट आणि ब्रोशरही लाॅंच केले आहे. त्यांनी पाच सहकारी संस्थांना एनसीओएल सदस्यत्व प्रमाणपत्रेही दिली.

नवी दिल्लीमध्ये सहकारी संस्थांच्या माध्यमातून सेंद्रिय उत्पादनांना चालना देण्याच्या राष्ट्रीय चर्चासत्राला संबोधित करताना शाह म्हणाले की एनसीओएल हे सेंद्रिय उत्पादकांसाठी एक व्यासपीठ आहे. आज आम्ही ‘भारत ऑरगॅनिक्स’ या ब्रँड अंतर्गत सहा उत्पादने प्रसिद्ध करत आहोत आणि अशी आणखी 20 उत्पादने डिसेंबरपर्यंत प्रसिद्ध केली जातील. ते म्हणाले की तूर डाळ, चना डाळ, साखर, राजमा, बासमती तांदूळ आणि सोना मसुरी तांदूळ ही सहा सेंद्रिय उत्पादने असतील. हे मदर डेअरीच्या सफल आउटलेट्स आणि ऑनलाइन प्लॅटफॉर्मद्वारे विकले जातील.

अमित शाह म्हणाले की रिटेल आउटलेट्सचे नेटवर्क तयार केले जात आहे, NCOL सुरुवातीला भारतात सेंद्रिय उत्पादने विकेल आणि नंतर इतर देशांमध्ये विक्री करेल. एनसीओएलच्या माध्यमातून सेंद्रिय उत्पादनांच्या विक्रीतून मिळणाऱ्या नफ्यातील सुमारे ५० टक्के हिस्सा थेट सभासद शेतकऱ्यांना हस्तांतरित केला जाईल, असे शाह म्हणाले.

या कार्यक्रमात सहकार राज्यमंत्री बी. l वर्मा, सहकार सचिव ज्ञानेश कुमार, ग्राहक व्यवहार सचिव रोहित कुमार सिंग, वाणिज्य सचिव सुनील बर्थवाल, एनडीडीबीचे अध्यक्ष आणि एनसीओएलचे प्रमुख मिनेश सी शाह आणि एफएसएसएआय सीईओ (मुख्य कार्यकारी अधिकारी) जी कमला वर्धन राव उपस्थित होते.

NCOL चे मुख्यालय गुजरातमध्ये आहे. 'मल्टी स्टेट कोऑपरेटिव्ह सोसायटी ऍक्ट २००२' अंतर्गत त्याची स्थापना करण्यात आली आहे. त्याचे मुख्य प्रवर्तक राष्ट्रीय दुग्धविकास मंडळ आहे. सरकारने नुकत्याच स्थापन केलेल्या तीन नवीन सहकारी संस्थांपैकी NCOL ही एक आहे. इतर दोन सहकारी संस्था प्रमाणित बियाणे आणि निर्यात क्षेत्रात काम करतात. देशभरात ७.८९ कोटी सहकारी संस्था आहेत.