Washim News : जिल्ह्यातील गावागावांत स्वच्छता राखण्यासाठी आणि शेतकऱ्यांचे उत्पन्न वाढविण्यासाठी कृषी विज्ञान केंद्राद्वारे प्रशिक्षणाच्या माध्यमातून कंपोस्ट खत निर्मितीचे तंत्र शिकवले जात आहे. यादृष्टीने जनजागरण कार्यक्रम घेण्यात येत आहे.

डॉ. पंजाबराव देशमुख कृषी विद्यापीठ अकोला व कृषी विज्ञान केंद्राने दत्तक घेतलेल्या मौजे शेलगाव घुगे (ता. वाशीम) या गावांमध्ये कृषी विभाग माध्यमातून व झायडेक्स इंडस्ट्रीजच्या सहकार्याने कंपोस्ट खत निर्मितीचे प्रशिक्षण देण्यात आले.

कार्यक्रमास सरपंच अजाबराव बाबाराव घुगे, केव्हीकेचे वरिष्ठ शास्त्रज्ञ व प्रमुख डॉ.रवींद्र काळे, पंदेकृविचे शास्त्रज्ञ डॉ. बी.डी. गीते, कृषी अर्थशास्त्रज्ञ डॉ. डी. एन. इंगोले, रमेश आंबेनागरे, संदीप गुट्टे व कृषी सहाय्यक श्री. राठोड उपस्थित होते.

श्री. इंगोले यांनी प्रास्ताविकामध्ये कार्यक्रमाचा उद्देश सांगून शेतकऱ्यांनी मोठ्या प्रमाणात तंत्रज्ञानाचा अवलंब करून खत उत्पादनाद्वारे शेतीमधील खर्च कमी करीत निव्वळ नफा वाढवावा, असे आवाहन केले.

डॉ. काळे यांनी गावामध्ये मोठ्या प्रमाणात तयार होत असलेले गोठ्यातील शेण आणि कचरा यांचे योग्य नियोजन करून कंपोस्ट खत निर्मिती तंत्रज्ञानाद्वारे गावातील उकंड्याचे व्यवस्थापन केल्यास त्यामधून खत निर्मिती सोबतच गावातील स्वच्छता

राखण्यास मोठी मदत होऊ शकते, असे सांगितले. डॉ. गीते यांनी शेतकऱ्यांनी शेतातील कचरा न जाळता त्यापासून मोठ्या प्रमाणात खत निर्मिती करावी ज्यामुळे निसर्गाचा ऱ्हास न होता कचऱ्याचे व्यवस्थापन चांगल्या पद्धतीने होऊ शकते असे सांगितले.

अन्सार अली यांनी खत निर्मितीमधून शेतीला लागणारे उत्कृष्ट खत मिळू शकते. कंपोस्ट कल्चर वापरामुळे आपण ४० ते ५० दिवसांमध्ये मोठ्या प्रमाणात खत निर्मिती करून वेळ व पैसा वाचवू शकतो, असे सांगितले.

गोपाल सुधाकर घुगे, रमेश नानाराव घुगे, बाबाराव काशीराम घुगे, सुरेश नामदेवराव घुगे व उमेश सुभाष घुगे या काही निवडक शेतकऱ्यांना प्रात्यक्षिक देण्यात आले.ट