Mumbai News : ‘‘पंतप्रधान नरेंद्र मोदी यांनी २०२० मध्ये आदर्श आचार संहितेचे उल्लंघन केले, पण त्याविरोधात केलेल्या तक्रारीवर कारवाई करण्यास राज्य निवडणूक आयोगाने टाळाटाळ केली आहे. आचारसंहितेचा भंग केल्याचे आयोगाने मान्य करत केवळ रेल्वे प्रशासनाला समज दिली, पण मोदींवर कारवाई केलेली नाही. तत्कालीन पंतप्रधान इंदिरा गांधी व शिवसेनाप्रमुख बाळासाहेब ठाकरे यांच्यावर कठोर कारवाई करण्यात आली होती.

कायद्यापेक्षा कोणीही मोठे नाही, मग मोदींवर आयोग कारवाई का करत नाही,’’ असा प्रश्न माजी मुख्यमंत्री पृथ्वीराज चव्हाण यांनी बुधवारी केला. या प्रकरणी उच्च न्यायालयात दाद मागणार असल्याचे त्यांनी पत्रकार परिषदेत सांगितले.

यासंदर्भात टिळक भवन येथील पत्रकार परिषदेत बोलताना श्री. चव्हाण म्हणाले, की २८ डिसेंबर २०२० रोजी सोलापूर जिल्ह्यातील सांगोला मतदार संघात पंतप्रधान मोदी, तत्कालीन रेल्वेमंत्री, कृषिमंत्री यांनी सांगोला ते पश्चिम बंगालमधील शालिमार या किसान रेल्वेच्या १०० व्या गाडीचे उद्‌घाटन केले.

या वेळी महाराष्ट्रात ग्रामपंचायत निवडणुका व पश्चिम बंगालमध्ये विधानसभेच्या निवडणुका सुरू होत्या. हा कार्यक्रम देशभर टीव्हीवर प्रसारित करण्यात आला. या कार्यक्रमासाठी निवडणूक आयोग व जिल्हा प्रशासन यांची कोणतीही परवानगी घेतली नव्हती. याविषयी प्रफुल्ल कदम या कार्यकर्त्याने निवडणूक आयोगाकडे तक्रार केली असता सुरुवातीला वेळकाढूपणा करण्यात आला.

पण शेवटी आचारसंहिता भंग झाल्याचे मान्य करत केवळ रेल्वे प्रशासनाला समज देण्यात आली. या प्रकरणी सरळ सरळ कायदा धाब्यावर बसवण्यात आलेला आहे, हे स्पष्ट दिसत असतानाही मोदींवर कारवाई केली जात नाही, असे श्री. चव्हाण म्हणाले.

या प्रकरणी तक्रार करणारे श्री. कदम यांनी आचारसंहिता भंग कशी झाली, याची माहिती सर्व नियम व कायद्यानुसार दिली. निवडणूक काळात मतदारांवर प्रभाव पाडण्याचा हा प्रयत्न असून आदर्श आचारसंहितेचा उघड भंग केलेला असल्याने मोदी यांचे लोकसभा सदस्यत्व रद्द करण्यात यावे, अशी मागणी त्यांनी केली आहे. या पत्रकार परिषदेला प्रदेशाध्यक्ष हर्षवर्धन सपकाळ, माजी खासदार कुमार केतकर, प्रदेश काँग्रेसचे वरिष्ठ प्रवक्ते अतुल लोंढे, अनंत गाडगीळ आदी उपस्थित होते.