Akola News : सन २०२३ च्या खरीप हंगामामधील कापूस व सोयाबीन उत्पादकांना शासनाकडून हेक्टरी अर्थसाह्य देण्याबाबत गेल्या काळात घोषणा झाली होती. यासाठी ई-पीक पोर्टलवर नोंदणीकृत शेतकऱ्यांची यादी पोर्टलवर उपलब्ध करून देण्यात आली. तथापि, खरीप हंगामात सात-बारावर नोंद असूनही पोर्टलवर नोंद नसलेले खातेदार,

वनपट्टाधारक खातेदार तसेच चंद्रपूर तालुक्यातील जिवती या तालुक्यातील नॉन डिजिटाइज खेड्यातील खातेदारांना अर्थसाह्याचा लाभ मिळू शकलेला नव्हता. आता या नोंद नसलेल्यांची माहिती संकलित करून येत्या काळात अर्थसाह्य करण्याबाबत कार्यवाही सुरू झाली आहे. यासाठी शासन निर्णयानुसार कार्यपद्धती निश्‍चित करण्यात आली आहे.

याबाबत विभागीय कृषी सहसंचालक, जिल्हा अधीक्षक कृषी अधिकाऱ्यांना मंगळवारच्या (ता. ३) पत्रानुसार कळवण्यात आले आहे.

ई-पीक पाहणी यादीत नाव नाही, परंतु त्यांच्या ऑनलाइन सातबारा उताऱ्यावर खरिपामध्ये कापूस, सोयाबीन पिकाची नोंद आहे, अशा शेतकऱ्यांना अर्थसाह्य दिले जाणार आहे. यासाठी संबंधित गावातील खाते क्रमांकनिहाय खातेदाराचे संपूर्ण नाव, कापूस व सोयाबीन पिकाखालील पेरणी झालेले क्षेत्र संकलित करून संबंधित तलाठ्यांनी गावाचे कृषी सहायकांना स्वाक्षरीत करून द्यावे.

या यादीसोबत संबंधित तलाठ्याने प्रमाणित केलेला ऑनलाइन सातबारा उतारा घेऊन जोडावा. तसेच राज्यातील आदिवासी शेतकऱ्यांना वनपट्टे वितरित करण्यात आलेले आहे, अशा वनपट्टा धारकांपैकी ज्या वनपट्ट्यावर खरीप हंगामात कापूस किंवा सोयाबीन अथवा दोन्ही पिकांची लागवड केली होती. त्याबाबतची गावनिहाय वनपट्टा क्रमांक, वनपट्टाधारक पूर्ण नाव, कापूस व सोयाबीन पिकाखाली असलेले क्षेत्र याची माहिती संकलित करून जिल्हाधिकाऱ्यांनी अंतिम यादी कृषी विभागास द्यावयाची आहे.

याबाबतच्या सूचना जिल्हाधिकाऱ्यांनाही देण्यात आलेल्या आहेत. जिवती तालुक्यातील गावांचे भूमी अभिलेख डिजिटइज झालेले नाही. तेथे ई-पीक पाहणी होऊ शकली नाही. अशा ठिकाणी जेथे भूमी अभिलेख डिजिटइज झाले नाहीत त्या गावातील तलाठ्यांकडून गावातील खाते क्रमांकनिहाय खातेदार लाभार्थी शेतकऱ्यांना मदत दिली जाईल.

माहिती भरण्यासाठी १३ पर्यंतची मुदत

खरीप सातबारा उताऱ्यावर नोंद असूनही नमूद पोर्टलवर नोंद नसलेले खातेदार, वनपट्टाधारक खातेदार व जिवती तालुक्यातील नॉन डिजिटाइज खेड्यात खातेदारांची माहिती www.scagridbt.mahait.org या पोर्टलवर तालुका कृषी अधिकाऱ्यांच्या लॉगिनमधून तत्काळ भरण्यात यावी, अशी सूचना करण्यात आली आहे. यासाठी तालुका कृषी अधिकाऱ्यांना लॉगिन करावे लागणार आहे. त्यानंतर पोर्टलवर टप्प्यानुसार माहिती भरावी लागेल. ही प्रक्रिया शुक्रवारपर्यंत (ता.१३) पूर्ण करण्याची कालमर्यादा देण्यात आली आहे.