Solapur ZP News : मार्च अखेर निधी खर्च करण्याची धावपळ असताना कर्मचाऱ्यांनी पुकारलेल्या बेमुदत संपामुळे जिल्हा परिषदेचा गाडा ठप्प झाला होता.

जुन्या पेन्शनच्या मागणीसाठी शासकीय व निमशासकीय कर्मचाऱ्यांनी पुकारलेला संप मागे घेतल्यानंतर जिल्हा परिषेदत मार्च अखेरला अवघे काही दिवस उरल्याने आता जिल्हा परिषदेची यंत्रणा मार्च अखेर सर्व निधी खर्च करण्यासाठी मिशन मोडवर काम करताना दिसत आहे.

येथे मार्च एण्डची जणू लगीनघाई उठली असून अधिकारी व कर्मचारी मार्च एण्डच्या कामात व्यस्त राहात आहेत.

जिल्हा परिषदेचे प्रभारी मुख्य कार्यकारी अधिकारी संदीप कोहिनकर यांनी आज आरोग्य विभागाचा समक्ष आढावा घेतला.

त्यानंतर महाआवास योजनेच्या कामांचाही त्यांनी आढावा घेतला. व्हीसीद्वारे त्यांनी जिल्ह्यातील गटविकास अधिकारी व जिल्हा परिषदेतील खाते प्रमुख यांचा आढावा घेतला.

जिल्हा परिषदेला मिळालेला निधी मार्च अखेरपर्यंत खर्च करावा अशा सक्त सूचना त्यांनी विभाग प्रमुखांना व गटविकास अधिकाऱ्यांना दिल्या आहेत.

जवळपास सात दिवसांचा संप करून आज कर्मचारी कामावर हजर झाल्याने जिल्हा परिषदेतील शुकशुकाट संपला होता.

जिल्हा परिषदेतील आजी-माजी पदाधिकाऱ्यांची, ग्रामस्थ व ग्रामपंचायतीच्या कारभाऱ्यांची वर्दळ बघायला मिळाली.

मार्च अखेरपर्यंत गावांमधील विकास कामांना प्रशासकीय मान्यता, देयके मंजूर करणे यासह विविध कामे करण्यासाठी जिल्हा परिषदेची यंत्रणा युद्ध पातळीवर कामाला लागल्याचे दिसत आहे.