Sindhudurg News : पहाटे थंडी आणि धुके, तर दुपारी उन्हाचा कडाका असे वातावरण जिल्ह्यात असून, कमाल आणि किमान तापमानात मोठा फरक होत आहे. या वातावरणाचा आंबा, काजू पिकांवर विपरीत परिणाम होण्याची शक्यता आहे.

जिल्ह्यात गेल्या चार-पाच दिवसांपासून वातावरणात सारखे बदल दिसून येत आहेत. गेल्या चार-पाच दिवसांपासून जिल्ह्यात कमाल तापमान ३६ ते ३७ अंश सेल्सिअस, तर किमान तापमान १४ ते १६ अंश सेल्सिअस इतके आहे.

कमाल आणि किमान तापमानात २० अंश सेल्सिअसचा फरक असल्याचा विपरीत परिणाम आंबा, काजू पिकांवर होण्याची शक्यता आहे. त्यातच वारंवार धुके पडत असल्यामुळे या पिकांवर कीड-रोगांचे प्रमाण देखील वाढण्याची शक्यता आहे.

काजू पिकांमध्ये सध्या काजू बी आणि बोंड पोखरणाऱ्या अळीचा अधिक प्रादुर्भाव दिसून येत आहे. या बदलत्या वातावरणामुळे आणखी कीड-रोग वाढण्याची शक्यता असल्याने आंबा, काजू बागायतदारांची धास्ती वाढली आहे.