Nashik News : नाशिक जिल्ह्यात पुढील पाच दिवसांचा अंदाज लक्षात घेता पुढील तीन दिवस हवामान कोरडे राहील. शनिवारी (ता. २५) हलका व रविवारी (ता. २६) मध्यम स्वरूपाच्या पावसाची शक्यता आहे, असा अंदाज भारतीय हवामान विभाग, प्रादेशिक हवामान केंद्र, मुंबई यांच्याकडून प्राप्त हवामान अंदाजानुसार व्यक्त करण्यात आला आहे, अशी माहिती फुले कृषी विद्यापीठाच्या ग्रामीण कृषी हवामान सेवा केंद्र, इगतपुरी यांच्याकडून देण्यात आली.

२२ ते २६ नोव्हेंबर या कालावधीत कमाल तापमान ३२-३४ अंश सेल्सिअस व किमान तापमान १४-१६ अंश सेल्सिअस दरम्यान राहण्याची शक्यता आहे. तसेच वाऱ्याचा वेग ७-१४ कि.मी./तास या दरम्यान राहण्याची शक्यता आहे.

शुक्रवारी (ता. २४) काही ठिकाणी हलका पाऊस किंवा मेघगर्जनेसह पाऊस तसेच शनिवारी (ता. २५) एक-दोन ठिकाणी मेघगर्जनेसह विजांचा कडकडाट आणि सोसाट्याचा वारा (३० ते ४० किमी प्रतितास वेग) वाहण्याची अधिक शक्यता असल्या कारणाने आपल्या पशुधनाचे व स्वतःचे संरक्षण करावे, असा सल्ला देण्यात आला आहे.

शेतकऱ्यांनी काळजी घ्यावी

शनिवारी आणि रविवारी असा दोन दिवस हलका ते मध्यम पावसाचा अंदाज लक्षात घेता, मळणी केलेली खरीप पिके तसेच वेचणी केलेला कापूस व कापणी राहिलेल्या (भात, नागली) पिकांना प्लॅस्टिक पेपर किंवा ताडपत्रीने झाकावे किंवा सुरक्षित जागेवर ठेवावे, असा सल्ला देण्यात आला आहे.