Raju Shetti Letter Amit Shah : राज्यातील साखर कारखान्यांचा गळीत हंगाम १५ नोव्हेंबरपासून सुरू झाला. यानंतर साखरेचे दर प्रतिक्विंटल ३ हजार १०० रुपयापर्यंत खाली आले आहेत. ऊस उत्पादक शेतकऱ्यांना याचा मोठा फटका बसू लागला आहे. सध्या बाजारात साखरेचा दर हा प्रतिक्विंटल ४ हजार रुपयापर्यंत आहे. यामुळे केंद्र सरकारच्या सहकार विभाग व अन्न नागरी पुरवठा मंत्रालयाने तातडीने चौकशी करावी. तसेच संबंधित साखर कारखाने व व्यापारी यांच्यावर त्वरित कारवाई करावी अशी मागणी माजी खासदार राजू शेट्टी यांनी केंद्रीय सहकारमंत्री अमित शहा व केंद्रीय अन्न नागरी पुरवठा मंत्री प्रल्हाद जोशी यांच्याकडे लेखी पत्राद्वारे शनिवार (ता.१४) केली आहे.

शेट्टीनी केंद्रीय सहकार मंत्रालयाला पत्रात दिलेल्या माहितीनुसार, मराठवाडा, विदर्भ व कर्नाटकमधील ज्या कारखान्यांची रिकव्हरी कमी आहे व आर्थिक अडचणीत आहेत असे कारखाने कमी दराने साखर विक्री करू लागले आहेत.

गेल्या महिन्याभरामध्ये ज्या कारखान्यांनी साखर विक्री केली आहे, ती किती रूपये दराने विकली व ज्या व्यापाऱ्यांनी ती साखर खरेदी केली आहे. ती साखर कोणत्या बाजारात किती दराने विक्री केली आहे. याची सखोल चौकशी केल्यास बिंग फुटणार आहे. काही कारखानदार व साखरेचे मोठे व्यापारी मिळून शेतकरी व ग्राहकांना लुबाडत असून या साखर विक्रीची सखोल चौकशी करावी, अशी मागणी शेट्टी यांनी पत्राद्वारे केली आहे.

कारखान्यांच्या गोदामामध्येच साखर...

याबाबत माजी खासदार राजू शेट्टी यांनी दिलेल्या माहितीनुसार, "महाराष्ट्र व उत्तर कर्नाटक सीमाभागातील साखर कारखान्यांचा गळीत हंगाम सुरू झाल्यानंतर साखर कारखान्यांचा साखर विक्रीचा दर ३ हजार १०० रूपयापर्यंत खाली आलेला आहे. सध्या बाजारात व्यापारी प्रतिकिलो ३७ रूपयांनी दुकानदारांना साखरेची विक्री करत आहे. दुकानदाराकडून ग्राहकांना प्रतिकिलो ४० रूपयांनी साखर विकली जात आहे. कर्नाटक व महाराष्ट्र राज्यातील काही खासगी व सहकारी साखर कारखानदारांचे नातेवाईकच साखरेचे व्यापारी आहेत. साखर कारखान्यांकडून कमी दराने विकलेली साखर बाजारात येत नसून ती साखर संबधित साखर कारखान्यांच्या गोडावूनमध्येच ठेवण्यात येत आहे". असे शेट्टी म्हणाले.