Akola News : ‘‘गुलाबी बोंड अळीचे जीवनचक्र खंडित करून पुढील हंगामातील प्रादूर्भाव टाळण्यासाठी कापूस पिकाच्या फरदडीचे निर्मूलन करावे,’’ असे आवाहन जिल्हा अधीक्षक कृषी अधिकारी शंकर किरवे यांनी कापूस उत्पादक शेतकऱ्यांना केले.

किरवे म्हणाले, ‘‘यंदाचा खरीप हंगामात पेरणी उशिरा झाल्याने सध्या कापूस पीक हंगाम अंतिम टप्यात आहे. अधिक उत्पादनासाठी काही ठिकाणी कापसाची फरदड घेण्याची शक्यता आहे. फरदडीमुळे गुलाबी बोंड अळीचे जीवनचक्र वर्षभर सुरू राहते. उपाययोजना म्हणून फरदड निर्मूलन करणे हा कपाशी पिकामध्ये महत्त्वाचा भाग आहे.’’

...अशा करा उपाययोजना

प्रादुर्भाव पुढील वर्षाच्या हंगामात वाढण्याची शक्यता अधिक असते. त्यामुळे कापसाची तिसरी वेचणी झाल्यानंतर म्हणजेच डिसेंबर ते जानेवारीनंतर कापूस पीक काढून घ्यावे

कापसाची शेवटची वेचणी झाल्यानंतर चरण्यासाठी बकऱ्या, गायी, इतर जनावरे सोडावीत - जनावरांनी प्रादुर्भाव युक्त बोंडे खाल्ल्यामुळे ७० टक्क्यांपर्यंत बोंड अळीचा प्रादुर्भाव कमी होण्यास मदत होते

पऱ्हाट्याचा शेतात ढीग रचून ठेवू नये

काढलेल्या पऱ्हाट्यांचे कंपोस्ट खत बनविण्यावर भर द्यावा.

गुराढोरांनी चरल्यानंतर कापूस श्रेडर मशिनने उभे कापसाचे पीक जमिनीत तुकडे करून दाबून टाकावे

गाडलेल्या ठिकाणी स्पिंकलरने सौम्य पाणी देऊन त्यावर कचरा करण्यासाठी ट्रायकोडर्मा द्रावणाची फवारणी करावी