Jalgaon News : जळगाव जिल्ह्यात रब्बी पिकांची पेरणी पूर्ण झाली आहे. त्यात जिल्ह्यात खरिपानंतर रब्बीतही मक्याची लागवड वाढली असून, एक लाख दोन हजार हेक्टरवर पोहोचली आहे. हरभऱ्याची पेरणी जळगावात दरवर्षी एक लाख ते एक लाख १० हजार हेक्टरपर्यंत असते. परंतु यंदा हरभऱ्याखालील क्षेत्र सुमारे ९८ हजार हेक्टर एवढे आहे. तर मक्याच्या क्षेत्राने रब्बीत एक लाख हेक्टरचा आकडा अनेक वर्षांनंतर गाठला आहे.

खानदेशात मक्याची लागवड दीड लाख हेक्टरपेक्षा अधिक आहे. यंदा मागील हंगामात खानदेशात मक्याची लागवड सुमारे ९५ हजार हेक्टरवर झाली होती. त्यात जळगाव जिल्ह्यातील लागवड सुमारे ६० हजार हेक्टर एवढी होती. परंतु यंदा मका लागवडीत मोठी वाढ जळगावात दिसत आहे.

मक्याचे टिकून असलेले दर व बाजारातील मागणी यामुळे मका लागवडीकडे शेतकऱ्यांचा कल वाढला आहे. गव्हाचीदेखील विक्रमी ६० हजार हेक्टरवर जिल्ह्यात पेरणी झाली आहे. गव्हाची पेरणी २० ते २२ हजार हेक्टरपर्यंत असायची. यंदा कापसाखालील मोठे क्षेत्र रोगराई, गुलाबी बोंड अळीच्या समस्येने रिकामे झाले. त्यात गहू, मका व हरभरा पेरणी झाली आहे. जळगाव जिल्ह्यात ज्वारीची सुमारे ५१ हजार हेक्टरवर पेरणी झाली आहे.

ज्वारी पेरणी अनेकांनी टाळली आहे. कारण मागील वेळेस ज्वारी दर कमी होते. जिल्ह्यात यंदा जलसाठे मुबलक आहेत. गिरणा, वाघूर, हतनूर, तोंडापूर, अग्नावती, मंगरूळ, सुकी, अभोडा, अंजनी, बोरी, मन्याड आदी मोठे, मध्यम सिंचन प्रकल्प पूर्ण भरले. त्यात गिरणा, वाघूर व हतनूरमधून रब्बीसाठी आवर्तन सोडण्यात आले आहे.

मका वाणांची टंचाई

यंदा सर्वच मका वाणांची मोठी मागणी रब्बीत होती. मका लागवड ऑक्टोबरअखेरीस सुरू झाली. ही लागवड या महिन्याच्या सुरुवातीलाही झाली आहे. विविध टप्प्यात मका पीक लागवड झाली असून, मका वाणांची टंचाई तयार झाली. काही वाणांची विक्री जादा दरातही अनेक कृषी केंद्रांत झाली आहे. तीन प्रकारच्या मका वाणांची मोठी मागणी जिल्ह्यात होती. मका बियाणे दरातही यंदा वाढ झाली. त्याचाही फटका बसला. एक बॅग (तीन ते चार किलो) २२०० ते ३००० रुपये दरात शेतकऱ्यांना घ्यावी लागली.