Maize Sowing : मक्याच्या लागवडीत बुलडाणा जिल्ह्याची झेप

Buldana News : मका उत्पादनात विदर्भात अग्रेसर असलेल्या बुलडाणा जिल्ह्यात यंदा सुमारे २३ हजार ५०० हेक्टरपेक्षा अधिक क्षेत्रावर लागवड पोचली असून, यंदा तुलनेने पीक परिस्थिती चांगली असल्याचे शेतकरी सांगत आहेत. जिल्ह्यात अनेक शेतकरी मक्याचे विक्रमी उत्पादनही घेत असतात.

बुलडाणा जिल्ह्यात मोताळा, मलकापूर, खामगाव, बुलडाणा, देऊळगावराजा, मेहकर हे तालुके मका उत्पादनात आघाडीवर आहेत. यंदाच्या हंगामात एकट्या मोताळ्यात रब्बीत सुमारे ५९०० हेक्टरपर्यंत मक्याची लागवड पोचली आहे. या तालुक्याचे सरासरी क्षेत्र १२७१ हेक्टर असून, त्या तुलनेत सुमारे ४५७ टक्के अधिक लागवड झाली.

जिल्ह्याचे सरासरी क्षेत्र ११७८१ हेक्टर आहे. त्यातुलनेत यंदा २३ हजार ५०० हेक्टरवर आतापर्यंत लागवड झालेली आहे. अनेकजण अद्यापही लागवड करीत असून हे क्षेत्र दररोज वाढते आहे. मागील काही वर्षात नैसर्गिक आपत्ती तसेच अळीमुळे शेतकरी मक्याच्या उत्पादनात पिछाडीवर होते. मात्र, अळीवर नियंत्रण मिळवण्यात बऱ्यापैकी यश येत असल्याने तसेच हरभरा, गहू या पिकांपेक्षा मका परवडत असल्याने शेतकरी पुन्हा याकडे वळत आहेत.

मोताळा अव्वल, शेगाव नाममात्र

मक्याची लागवड ५९०० हेक्टरपर्यंत मोताळ्यात झाली. दुसरीकडे जिल्ह्यात शेगाव तालुक्यात सर्वांत कमी २३ हेक्टरवर पेरणी झाली. मोताळा, नांदुरा, मलकापूर, खामगाव हे घाटाखालील आणि घाटावरील बुलडाणा, चिखली, सिंदखेडराजा हे तालुके मका उत्पादक म्हणून ओळखले जातात.

तालुकानिहाय क्षेत्र

तालुका सरासरी प्रत्यक्ष लागवड

जळगाव जामोद ६०७ १८६४

संग्रामपूर १०६० ६२८

चिखली १११७ १९४६

बुलडाणा २६५९ ३३१७

देऊळगावराजा ११७६ १२०८

मेहकर १९५ ५०४

सिंदखेडराजा ७५९ ३९४

लोणार २३८ १२९

खामगाव ५३६ २३५०

शेगाव ६७ २३

मलकापूर १२३३ ३८७१

मोताळा १२७१ ५८१४

नांदुरा ८५६ १४५७