Chhatrapati Sambhajinagar : सिल्लोड तालुक्यातील भराडी येथे सिल्लोड कृषी उत्पन्न बाजार समितीमार्फत मराठवाड्यातील पहिल्या मिरची प्रक्रिया सुविधा केंद्राचे भूमिपूजन बुधवारी (ता.२) पालकमंत्री अब्दुल सत्तार यांच्या हस्ते करण्यात आले.

यावेळी बनकिन्होळा येथे मिरची प्रक्रिया केंद्र, शीतगृह व निर्यात केंद्र तसेच कंकराळा येथे फळ प्रक्रिया, शीतगृह, साठवणूक, हाताळणी व निर्यात केंद्र प्रकल्पाचे भूमिपूजनही करण्यात आले. या प्रकल्पांसाठी एकूण ३९ कोटी रुपयांचा निधी मंजूर करण्यात आला असून, प्रत्येक केंद्रासाठी १३ कोटी रुपये निधी मंजूर झाला असल्याची माहिती पालकमंत्री सत्तार यांनी दिली.

या प्रसंगी कृषी पणन मंडळाचे कार्यकारी संचालक संजय कदम, मॅग्नेटचे प्रकल्प संचालक विनायक कोकरे, डॉ. अनमोल यादव, माजी उपनगराध्यक्ष अब्दुल समीर अ. सत्तार, जिल्हा बँकेचे चेअरमन अर्जुन गाढे यांच्यासह इतर मान्यवर उपस्थित होते.

पोखरा योजनेसाठी ११ हजार कोटींची तरतूद

यावेळी पालकमंत्री अब्दुल सत्तार यांनी पोखरा योजनेसाठी ११ हजार कोटी रुपयांची तरतूद करण्यात आल्याचे जाहीर केले. तसेच सिल्लोड येथे कृषी भवन उभारण्यासाठी ३० कोटी रुपयांचा निधी मंजूर करण्यात आला असल्याची माहितीही त्यांनी दिली.