Nashik News : द्राक्ष हंगामासाठी महत्त्वाची असलेली फळधारणा छाटणीची लगबग सुरू झाली आहे. पावसाचा धोका पत्करुन आगाप छाटणीचा श्रीगणेशा झाला आहे. निफाड तालुक्यातील ५० हजार एकरवरील बागांपैकी सप्टेंबर अखेरपर्यंत २० टक्के द्राक्षबागांच्या छाटण्या होण्याची शक्यता आहे.

बहुतांश शेतकऱ्यांनी ऑक्टोबरमधील विविध मुहुर्तावर छाटणीचे नियोजन केले आहे. पावसाने उघडीप दिल्याने फळछाटणीसाठी आदिवासी मजूर दाखल होत आहे. सप्टेंबर महिन्याच्या मध्यावर दरवर्षी निफाड तालुक्यातील द्राक्षबागांची फळधारणा छाटणी धांदल उडते. महिनाभरात धुव्वाधार पावसाने बागांमधील द्राक्षवेलींची पानगळ झाली आहे.

पानगळ झालेल्या द्राक्षवेलींची छाटणी केल्याशिवाय शेतकऱ्यांकडे पर्याय दिसत नाही. शिवाय मोठे क्षेत्र असलेल्या शेतकऱ्यांनी जोखीम पत्करून रंगीत वाणांच्या बागेच्या छाटणीचे काम हाती घेतले आहे. गणपती, नवरोत्रोत्सवाच्या मुहुर्तावर द्राक्षबागांची छाटणी करण्याची पूर्वी शेतकऱ्यांची असलेली श्रद्धा आजही काही प्रमाणात आहे. पण, मुहुर्तावरच्या छाटणीच्या झळा शेतकऱ्यांना बसल्या आहेत.

एकाच दिवशी सरसकट छाटणीचे दुष्पपरिणाम शेतकऱ्यांना सोसावे लागतात. त्यात बागेतील वांझ काढणे, घडबुडवणी ही कामे एकाच वेळी येतात. त्या कामासाठी मजुरांकडून शेतकऱ्यांची आर्थिक कोंडी केली जाते.

प्रतिकुल हवामान एकाच टप्प्यात आल्यास द्राक्षबागा रोगांना बळी पडून औषध फवारणीचा खर्च वाढतो. शिवाय एकाच वेळी सर्व द्राक्ष बाजारात येत असल्याने बाजारभावाचाही धोका असतो. त्यामुळे बागांची विभागणी करून आपल्या सोयीने आता शेतकरी छाटणी करीत आहे.